16,059 total views
Isinusulong ni Leyte 1st District Representative at dating House Speaker Martin Romualdez ang House Bill No. 7 na naglalayong amyendahan ang Bank Secrecy Law upang mas mapalakas ang laban kontra korapsyon, money laundering, at iba pang financial crimes.
“Kung nais natin ng tapat na pamahalaan at matatag na sistemang pinansyal, kailangan nating i-update ang ating mga batas at bigyan ng tamang kapangyarihan ang mga regulator para maprotektahan ang pera ng taumbayan,” pahayag ni Romualdez.
Sa ilalim ng panukala, papayagan ang Bangko Sentral ng Pilipinas (BSP) na suriin ang bank deposits—kabilang ang foreign currency accounts—kapag may sapat na batayan ng pandaraya o iregularidad. Saklaw ng imbestigasyon ang mga opisyal, stockholders, empleyado, at sinumang konektado sa mga institusyong nasa ilalim ng pangangasiwa ng BSP, gayundin ang mga ipinasarang bangko.
“Sa kasalukuyan, nagagamit ang batas para itago ang money laundering, tax evasion, at korapsyon. Dapat na itong itama,” ayon sa mambabatas.
Upang mapanatili ang privacy ng mga lehitimong depositors, lilimitahan ang paggamit ng impormasyon mula sa BSP. Tanging mga ahensyang tulad ng Securities and Exchange Commission (SEC), Philippine Deposit Insurance Corporation (PDIC), Anti-Money Laundering Council (AMLC), Department of Justice (DOJ), o korte lamang ang maaaring makatanggap ng impormasyon kung kinakailangan ng batas.
Tiniyak ng panukala na walang pananagutang kriminal o sibil ang mga bangko o empleyado kung sila ay kumilos nang may kabutihang loob at alinsunod sa utos ng BSP. Samantala, ang sinumang maglalabas ng impormasyon nang walang pahintulot ay papatawan ng parusang pagkakakulong mula dalawa hanggang sampung taon, at multang mula ₱50,000 hanggang ₱2 milyon.
Layon ng panukala na iayon ang Pilipinas sa mga pandaigdigang pamantayan sa laban kontra money laundering at alisin ang mga hadlang sa paghabol sa mga hidden wealth.
Naniniwala si Romualdez na ang pagbibigay ng malinaw at legal na kapangyarihan sa BSP ay magpapatibay sa oversight ng mga institusyon, magpapalakas sa tiwala ng mga mamumuhunan, at magbibigay proteksyon sa financial system ng bansa laban sa pang-aabuso.
