15,810 total views
Nangangambang malubog pa sa baha ang ilang bayan sa lalawigan ng Bulacan dulot ng patuloy na pag-uulan dala ng hanging Habagat.
Ayon kay Malolos Diocesan Social Action Coordinator, Ms. Daday Pascual, ilang pamilya at indibidwal na ang nagsilikas sa mga evacuation center dahil sa pagtaas ng tubig sa ilang lugar malapit sa mga ilog.
Sinabi ni Pascual na maaari pang madagdagan ang evacuees dahil sa pagtaas ng antas ng tubig mula sa dagat na magpapalubog sa ilang lugar.
“May mga evacuees na po sa ilang lugar malapit sa mga ilog. Siguradong dadami pa po ito dahil sa mataas ang high tide level sa buong week,” pahayag ni Pascual sa panayam ng Radyo Veritas.
Nakahanda naman ang SAC Malolos sa pamamahagi ng relief goods sa mga apektado ng sama ng panahon.
Matagal nang binabaha ang ilang bayan sa Bulacan dahil na rin sa lokasyon nitong malapit sa dagat.
Ngunit lalo pa itong nalubog sa baha dahil sa reclamation projects, partikular sa Bulakan, Bulacan, para sa itinatayong New Manila International Airport.
Batay sa pinakahuling ulat ng National Disaster Risk Reduction and Management Council (NDRRMC), umabot na sa limang katao ang nasawi, lima ang sugatan, at pito ang nawawala dahil sa pinsalang dulot ng bagyong Crising at hanging Habagat.
Apektado ang kabuuang bilang na higit 800,000 indibidwal o 225,000 pamilya sa mahigit 1,500 barangay sa iba’t ibang rehiyon sa bansa.
Sa kasalukuyan, mahigit 20,000 katao o halos 6,000 pamilya ang nananatili sa mga evacuation center, habang patuloy ang monitoring at relief operations ng mga lokal na pamahalaan at humanitarian groups.
