21,685 total views
Humiling ng panalangin si Cebu Archbishop-designate Alberto Uy makaraang maitalaga sa mas malawak na pagmimisyon sa Archdiocese of Cebu.
Batid ng obispo na kaakibat ng pagtalaga sa metropolitan territory ang mas malawak na gawaing pagpapastol lalo’t ang arkidiyosesis ang isa sa pinakamalaking ecclesiastical see ng Pilipinas na may halos limang milyong mananampalataya.
“Kini nga appointment dili nato angay sabton nga promotion kundili usa ka pagtugyan ug mas dako nga misyon,” pahayag ni Archbishop-designate Uy.
[Ang appointment na ito ay hindi natin dapat unawain bilang promotion, kundi bilang isang pagtanggap ng mas malaki at mas mabigat na misyon.]
Aminado si Archbishop-designate Uy na bagamat hindi ito karapat-dapat ay buong kababaang loob nitong tinanggap ang pagsugo ng Diyos kasabay ng pasasalamat sa tiwala at pagkakataong makapaglingkod sa kristiyanong pamayanan ng Cebu na tinaguriang ‘cradle of Christianity.’
“I felt unworthy of such a great responsibility. But along with the fear came a deep sense of gratitude — gratitude for the trust given me, and for the opportunity to serve God and His people in a deeper way,” giit ng bagong talagang arsobispo.
Matatandaang sa kapistahan ng Our Lady of Mt. Carmel nitong July 16 nang isinapubliko ng Vatican ang appointment sa obispo bilang kahaliling pastol kay Archbishop Jose Palma na nagdiwang ng kanyang ika-75 taong gulang noong March 19, 2025 ang mandatory retirement age ng isang obispo.
Apela ni Archbishop-designate Uy sa mamamayan ang patuloy na panalangin para sa kalakasan at gabay ng Panginoon sa tatahaking landas bilang punong pastol sa mahigit 600 diocesan at religious priests na naglilingkod sa arkidiyosesis sa 173 mga parokya.
Tubong Ubay, Bohol ang bagong arsobispo at nagtapos ng kanyang philosopy sa Immaculate Heart of Mary Seminary sa Tagbilaran City, theology naman at master’s degree ng pastoral ministry sa St. John Mary Vianney Theological Seminary sa Cagayan de Oro City habang licentiate ng sacred theology sa Loyola School of Theology sa Quezon City.
Inordinahang pari si Archbishop-designate Uy noong 1993 sa Diocese of Talibon at ginampanan ang iba’t ibang tungkulin sa diyosesis.
Kasunod nang appointment nasa limang ecclesiastical territory ang sede vancate sa Pilipinas ang Boac, Kalibo, San Jose sa Nueva Ecija, Tabuk at ang Tagbilaran.
