27,321 total reads
Bilang tugon sa lumalalang krisis sa kalusugang pangkaisipan sa bansa, ilulunsad ng Cofradía de Tránsito de Nuestra Señora ang kauna-unahang Mental Health Mission sa darating na August 30, 2025, sa San Nicolas de Tolentino Parish, Bahay Toro, Quezon City.
Ayon kay Rex Jardinero, Pangulo ng Cofradía, layunin ng programa na makapaghatid ng libreng mental health support sa mga mamamayang hindi kayang magpakonsulta sa mga health facilities.
“Bilang konkretong tugon sa hamon na tumulong sa mga nangangailangan ng suportang mental at emosyonal, isasagawa ng Cofradía ang Mental Health Mission,” ani Jardinero.
Ang aktibidad ay bahagi rin ng paghahanda ng Cofradía para sa ika-400 anibersaryo ng pagdating sa Pilipinas ng mapaghimalang imahe ng Nuestra Señora de la Salud noong 1634, sa pamamagitan ng mga misyonerong Agustino.
Sa panahong ito, ninanais ng grupo na makilakbay kasama ang mga nahihirapan sa katahimikan, upang ipadama ang paglingap at kagalingang hatid ni Inay Salud.
“Many are silently struggling with emotional and mental burdens. This time, we walk with them — with compassion, with care, and with Inay Salud’s healing love,” saad pa ng grupo.
Ang mental health mission ay isinasakatuparan sa pakikipagtulungan ng San Nicolas de Tolentino Parish at ng MindBlends Psychological Services, na magbibigay ng konsultasyon sa mga lisensyadong mental health professionals.
Ayon sa pag-aaral ni Dr. Wilfredo II Francis Mina mula sa Guidance and Counseling Program ng University of the Philippines Manila, mahigit 11% ng populasyon ng Pilipinas — o humigit-kumulang 12.5 milyong Pilipino — ang nakararanas ng iba’t ibang uri ng mental disorders, dulot ng kahirapan, kalamidad, at mga hindi pagkakapantay-pantay sa lipunan.
Samantala, kamakailan lamang ay nabahala ang Philippine National Police (PNP) sa mahigit 2,000 kaso ng pagpapatiwakal na naitala sa unang anim na buwan ng 2025.
Dahil dito, nananawagan si Antipolo Bishop Ruperto Santos ng mas malalim na pagtutulungan ng simbahan at pamahalaan upang tugunan ang lumalalang krisis sa mental health “nang may malasakit at buong puso.”
Para sa mga nagnanais lumahok sa libreng mental health consultation, maaaring magpatala sa pamamagitan ng link na ito: https://forms.gle/7ovdTL2o9bMYB3hN7 o kaya ay i-scan ang QR code para sa one-on-one mental health support sessions na isasagawa sa gabay ng mga lisensyadong health professionals.
