25,954 total reads
Nagpapasalamat ang mga residente ng Mariahangin, Bugsuk sa Balabac, Palawan sa pagsuporta ng Simbahang Katolika, matapos maglabas ng pastoral statement ang Catholic Bishops’ Conference of the Philippines (CBCP) na mariing kinokondena ang sapilitang pagpapalayas sa mga residente ng isla para bigyang-daan ang planong luxury tourism project.
Ayon kay Bhebz Pelayo, isa sa mga residente ng Sitio Mariahangin, matagal na nilang hinintay ang ganitong suporta mula mismo sa mga kardinal at obispo.
Pinuri ni Pelayo ang pagsuporta ng Simbahan, hindi lamang sa panalangin, kundi pati sa konkretong tulong at presensya sa kanilang pakikipaglaban.
“Umaasa po kami na sa pamamagitan ng pahayag na ito, matauhan na po ang mga ahensya ng gobyerno na may mandato na tulungan kami. Sana po ay kumilos na sila para sa kapakanan ng buong komunidad,” ayon kay Pelayo.
Nagpahayag din ng pasasalamat si Sally Bersabal, Head Servant ng Our Lady of Perpetual Help Chapel, lalo na kay Puerto Princesa Bishop Socrates Mesiona, sa walang sawang panalangin at tulong sa pamayanan.
Binigyang-diin ni Bersabal na naging mahalagang sandigan para sa komunidad ang mga materyal na tulong mula sa Simbahan sa gitna ng kanilang pinagdaraanan.
“Maraming-maraming salamat po sa tulong at suporta ng kaparian, lalo na po kay Bishop Socrates Mesiona… Sa loob ng isang taon, hindi n’yo kami pinabayaan sa mga panalangin na mapaalis ang mga blue guards,” ayon kay Bersabal.
Sa pahayag ng kapulungan, sa pangunguna ni CBCP president, Kalookan Bishop Pablo Virgilio Cardinal David, nanawagan ang mga obispo sa Department of Agrarian Reform (DAR) at National Commission on Indigenous Peoples (NCIP) na muling suriin ang mga land coverage notice at pabilisin ang pagbibigay ng Certificate of Ancestral Domain Title (CADT) para sa mga Molbog at Cagayanen.
Para sa mga taga-Mariahangin, higit pa sa simbolo ang moral at espirituwal na suporta ng Simbahan na nagsilbing tunay na pag-asa at matatag na sandigan sa gitna ng pakikipaglaban.
