26,593 total views
Itinuturing ni Lipa Archbishop Gilbert Garcera na bunga ng pananampalataya, pag-ibig at pag-asa ang newly renovated interior ng Archdiocesan Shrine & Parish of St. Joseph the Patriarch sa San Jose, Batangas.
Ito ang pagninilay ng Arsobispo sa pagpapasinaya sa bagong ayos na Simbahan noong ika-25 ng Agosto, 2025 kasabay na rin ng paghahanda para sa ika-25 anibersaryo ng pagkakadeklara sa Simbahan bilang Archdiocesan Shrine noong 2001.
Ayon kay Archbishop Garcera, ang pagsasaayos at pagpapaganda sa dambana ay maituturing ding isang tugon sa Sinodo na ang Simbahan ay isang lugar kung saan nakikita ang tatlong haligi ng Sinodo na -participation, communion, and mission.
Layon nito na bilang tahanan ng Diyos ay mas mahihimok nito ang mga mananampalataya na ganap na makibahagi sa misyong higit na palaganapin ang Mabuting Balita ng Diyos at pagpapasalamat sa taon ng Hubilehiyo.
“Ang pagbabasbas ng inyong kisame at pagpapaganda ng Simbahan, tanda Fr. Arnold [Fr. Arnold Rosal, OSJ – rector and parish priest] ng inyong tugon sa Sinodo na nagsasabing ang eukaristiya, ang Simbahan ay lugar kung saan nakikita ang tatlong haligi ng Sinodo -participation, communion, and mission. Pinaganda ninyo ang Simbahan sapagkat ito ang bahay ng Diyos.” Bahagi ng pagninilay ni Archbishop Garcera.
Dinaluhan ang pagpapasinaya sa newly renovated interior ng Simbahan ng mga opisyal ng bayan ng San Jose, mga lingkod ng Simbahan ng dambana at maging ng mga opisyal ng National Historical Commission of the Philippines (NHCP) na pinuri ang maayos na pagkakapreserba ng arkitektura at kasaysayan ng Archdiocesan Shrine & Parish of St. Joseph the Patriarch na itinayo noong 1812.
Ayon kay NHCP Chairperson Regalado Trota Jose, mahalaga ang pagtiyak hindi lamang sa kagandahan ng Simbahan kundi sa mismong katatagan ng istruktura nito upang masigurado hindi lamang ang kaligtasan ng bawat isa kundi maging ang pagpapatuloy ng misyon nito sa pagpapalaganap ng Salita ng Diyos.
Ipinaliwanag ni Jose, kabilang sa layunin ng sining ang maipalapit ang bawat isa sa Diyos kaya naman umaasa ang opisyal na maging daan ang newly renovated interior ng Simbahan upang patuloy na makapagbigay ng inspirasyon sa hatid na mensahe ni San Jose at ni Hesus para sa lahat.
Iginiit ng opisyal, walang katuturan ang kagandahan ng Simbahan kung hindi nito mahihikayat ang mga mamamayan na maging mabuti sa kanyang kapwa nilalang.
Umaasa naman si Archbishop Garcera na ang bagong anyo ng dambana ay higit na makapaghikayat ng mas maraming mananampalataya na magsimba at mag-alay ng debosyon kay San Jose kung saan umaasa ang Arsobispo na tulad ng kisameng nag-aalaga sa loob ng Simbahan, nawa ang pananampalataya ay maging kanlungan din ng bawat isa.
