42,392 total views
Isang Pilipinong Pari ang itinalaga ng Santo Papa bilang bagong Auxiliary Bishop ng isang diyosesis sa Estados Unidos.
Ayon sa Holy See Press Office, itinalaga ng Kanyang Kabanalan Pope Leo XIV si Msgr. Andres Ligot bilang bagong Auxiliary Bishop ng Diocese of San Jose sa California.
Kasalukuyang nagsisilbi si Msgr. Ligot bilang Vicar General ng nasabing diyosesis mula 2023.
Si Msgr. Ligot ay pari mula sa Diocese of Laoag bago opisyal na mailipat sa Diocese of San Jose noong 2004, kung saan siya rin naglingkod sa iba’t ibang parokya.
Ang pagtatalaga kay Bishop-elect Ligot ay itinuturing na dagdag na biyaya at inspirasyon hindi lamang sa Simbahang Katolika sa California kundi maging sa pamayanang Pilipino sa buong mundo.
Sa kasalukuyan, ilan pang mga Pilipinong Obispo ang naglilingkod sa iba’t ibang bansa sa labas ng Pilipinas, kabilang na sina Bishop Oscar Solis ng Salt Lake City—ang kauna-unahang Filipino bishop na naitalaga sa Estados Unidos—at iba pang mga pari na may mahalagang tungkulin sa iba’t ibang diyosesis sa buong mundo.
Sa pagkakatalaga kay Msgr. Ligot, muling pinatutunayan ang masiglang ambag ng mga Pilipinong pari at obispo sa paglilingkod sa iba’t ibang bansa.
Matatandaang kinikilala ng SimbahanD ang mahalagang papel ng mga Pilipino sa pandaigdigang misyon ng pagpapalaganap ng Ebanghelyo, lalo na sa iba’t ibang bansa kabilang na sa Estados Unidos kung saan may malaking bilang ng mga mananampalatayang Pilipino.
source:
https://press.vatican.va/content/salastampa/it/bollettino/pubblico/2025/08/29/0600/01045.html#california
