21,146 total views
Inilunsad ng Radyo Veritas ang One Godly Vote – Catholic Advocates for Responsible Electorate campaign sa EDSA Shrine, Quezon City. Layunin nitong bigyan ng sapat na kaalaman at wastong gabay ang publiko sa tamang pagboto, lalo na’t papalapit na ang Presidential election sa taong 2028.
Dumalo sa paglulunsad ang mga kinatawan mula sa iba’t ibang parokya sa Archdiocese of Manila na magiging katuwang ng simbahan sa voter’s education campaign.
Tampok naman sa talakayan sina Fr. Anton CT Pascual, executive director ng Caritas Manila, Fr. Vic Sadaya, at Atty. John Castriciones.
Sa kanyang pahayag, binigyang-diin ni Fr. Pascual na ang pinakamalaking “disaster” na kinahaharap ng bansa ay hindi bagyo, lindol, o pandemya, kundi ang matinding kahirapan na araw-araw na pinapasan ng mga Pilipino.
“Kaya’t mahalaga na tayo po ay mag-usap at makinig sa isa’t isa. Kung gusto nating baguhin ang ating bansa sa pamamagitan ng mabuting pamamahala—good governance—simulan na po natin ngayon, huwag na nating hintayin ang 2028. Ang bagyo, tatlong araw lang; ang lindol, ilang segundo lang; kahit COVID, ilang taon lamang. Pero ang kahirapan, araw-araw. Kaya’t nararapat lamang na ang pamahalaang ating ibinoto ay lagi ring naroroon upang tugunan ito,” ani Fr. Pascual.
Ipinahayag ni Fr. Jerome Secillano, executive secretary ng Catholic Bishops’ Conference of the Philippines – Episcopal Commission on Public Affairs, ang kanyang pag-asa na magiging matagumpay ang kampanyang ito at maghahatid ng mga pinunong tunay na maglilingkod at magmamalasakit sa bayan.
Inaasahang ilulunsad sa buong bansa ang One Godly Vote campaign ngayong Nobyembre.
