25,326 total reads
Pangungunahan ni Apostolic Nuncio to the Philippines Archbishop Charles Brown ang pormal na pagluluklok kay Archbishop-designate Alberto Uy bilang ikalimang arsobispo ng Archdiocese of Cebu sa isang banal na misa sa Setyembre 30, 2025, sa Cebu Metropolitan Cathedral.
Bilang tampok ng pagdiriwang, si Cardinal Luis Antonio Tagle, Pro Prefect ng Dicastery for Evangelization, ang magsisilbing homilist sa naturang misa.
Pagdating at Unang Araw (Setyembre 28)
Darating si Archbishop Uy sa Cebu bandang alas kuwatro ng hapon at sasalubungin ng mga mananampalataya sa port ng lungsod. Sa ganap na alas singko ng hapon, isasagawa ang Profession of Faith, Vespers, at Unveiling ng Coat of Arms sa Shrine of San Pedro Calungsod sa Archbishop’s Residence Compound.
Ikalawang Araw (Setyembre 29)
Sa umaga, isang misa ang gaganapin sa St. Joseph Chapel sa alas sais, na susundan ng tree planting activity at feeding program sa Abtanan sa Kalooy. Magkakaroon din ng Veneration sa Basilica Minore del Sto. Niño de Cebu.
Pagsapit ng alas 10:45 ng umaga, idaraos ang civic reception kasama ang mga lokal na opisyal ng Cebu City. Sa hapon, magkakaroon ng hiwalay na civic reception na pangungunahan naman ng mga opisyal ng Lalawigan ng Cebu.
Ikatlong Araw (Setyembre 30)
Sa ganap na alas nuwebe ng umaga, isasagawa ang banal na misa at ang pormal na rito ng pagluluklok kay Archbishop-designate Uy sa cathedra ng Cebu Metropolitan Cathedral.
Hindi lamang ito isang seremonya ng paglilipat ng tungkulin kundi isang mahalagang yugto para sa buong Simbahang Katolika sa Cebu. Ang Archdiocese of Cebu, na kinikilala bilang isa sa pinakamalaking arkidiyosesis sa bansa na may halos limang milyong mananampalataya, ay may mahalagang papel sa kasaysayan ng Kristiyanismo sa Pilipinas.
Si Archbishop-designate Uy, na ngayon ay hahalili bilang pastol ng arkidiyosesis kay Archbishop Jose Palma ay inaasahang magpapatuloy sa tradisyon ng malakas na pananampalataya at paglilingkod sa sambayanan.
