6,257 total views
Mariing kinondena ng Diyosesis ng Malolos ang talamak na katiwalian kaugnay ng ghost flood control projects na nagpapalala sa kalunos-lunos na sitwasyon ng mga mamamayan sa lalawigan at mag karatig-lugar.
Binigyang-diin ni Bishop Dennis Villarojo, kasama ang mga pari ng diyosesis, na ang mga proyektong pinondohan mula sa buwis ng taumbayan ay hindi naisakatuparan at nauwi lamang sa korapsyon.
“Ipinapahayag namin ang paninindigan laban sa talamak at sistematikong kultura ng korupsiyon at kasakiman na patuloy na nagpapahirap sa ating bansa… Sa pagkakait ng mga imprastrukturang sana’y nagliligtas-buhay, patuloy tayong nalulubog sa baha, at hindi natatapos ang kahirapan at kawalang-katarungan sa ating bayan,” pahayag ni Bishop Villarojo.
Iginiit ng obispo na ang katiwalian sa flood control projects ay hindi lamang kakulangan sa pamamahala kundi isang mabigat na kasalanan laban sa Diyos at sa kapwa, dahil inilalagay sa panganib ang buhay ng marami at lalo pang nagpapabigat sa kahirapan at kawalang-katarungan.
Dagdag pa ni Bishop Villarojo na bilang mga tagapaggabay ng sambayanan sa pananampalataya, hindi maaaring manahimik lamang ang simbahan habang ang mali ay patuloy na umiiral at nagiging normal.
“Bilang mga pastol, hindi kami maaaring manahimik kapag ang sambayanan ay napapahamak at kapag ang kasalanan ay nagiging bahagi na ng sistema, at ang kawalang-katarungan ay nagiging pangkaraniwan na,” giit ng obispo.
Kasabay nito, nanawagan ang diyosesis sa mga pinuno ng pamahalaan na gampanan ang tungkulin nang may integridad at tiyakin ang agarang imbestigasyon sa mga pekeng proyekto.
Hinimok din ni Bishop Villarojo ang mga ahensya, mambabatas, at hudikatura na maglatag ng pangmatagalang solusyon, papanagutin ang mga tiwaling opisyal, at tiyaking hindi maantala ang katarungan.
Hamon din ng obispo sa mga mananampalataya at Simbahan na iwaksi ang katiwalian, maging mapanuri, at palakasin ang pananalangin sa pamamagitan ng pagsasagawa ng mga Banal na Oras ng pagbabayad-puri, at mga Banal na Misa upang hilingin ang pangingibabaw ng mabuting pamamahala sa lipunan.
“Magtulungan tayong muli-kaparian at layko-hindi lamang sa pagpapatayo ng mga nasira o naudlot na imprastruktura kundi pati sa pagpapanumbalik ng tiwala ng bayan… Sa diwa ng pananampalataya at katapangan, buong lakas naming isinisigaw. Tama na ang mga huwad at palpak na imprastraktura! Tama na ang katiwalian!,” saad ni Bishop Villarojo.
