9,955 total reads
Sa kanyang pastoral letter na babasahin sa lahat ng misa ngayong Linggo, Setyembre 21, nanawagan si Lingayen-Dagupan Archbishop Socrates B. Villegas ng mas maigting na pagkilos laban sa katiwalian at maling kultura sa lipunan.
Ang liham ay pinamagatang “Kulang pa ang Tama na!”, kasabay ng paggunita ng ika-53 anibersaryo ng deklarasyon ng Martial Law.
Mariing ipinahayag ni Archbishop Villegas na hindi sapat ang mga protesta o limitadong imbestigasyon sa katiwalian.
“It is not enough to investigate the corruption of the flood control projects. Kulang pa! We must abolish the pork barrel of lawmakers that makes stealing easy to do,” anang Arsobispo.
Hinimok din niya ang mamamayan na tigilan ang paghingi at pagtanggap ng pabor mula sa mga pulitiko.
“Huwag hihingi. Huwag tatanggap! … Magalit sa corrupt! It is not enough to vote for the honest. Kulang pa. Bantayan sila!”
Ayon kay Villegas, dapat magsimula ang laban sa bawat isa, sa araw-araw na pagiging tapat, at sa pagtutol sa anumang uri ng pandaraya.
“We must be angry at the corruption within us otherwise the rally will be ‘Tama na! Kami naman!’”
Dagdag pa niya, ang protesta at panawagan ng pagbabago ay nagiging makabuluhan lamang kung ito ay sabayan ng pagbabagong-loob.
“Protest is good but repentance gives it power. Change is good but atonement makes it lasting.”
Binalikan din ng Arsobispo ang karanasan ng bansa sa ilalim ng diktadura, kung saan maraming Pilipino ang pinaslang, dinukot, at ikinulong.
“Those were the worst and darkest of times; those were also the best of times for heroism and martyrdom. Martial law made many heroes even if it almost killed a whole nation and corrupted our culture; the effects still palpable now,” ayon pa sa arsobispo.
Iginiit niya na hanggang ngayon, nananatiling hindi pa rin naibabalik ang ninakaw na yaman at naghihintay pa rin ng hustisya ang mga biktima ng Martial Law.
