3,187 total reads
Iginiit ni Caceres Archbishop Rex Andrew Alarcon ang kahalagahan ng maagap na paghahanda upang maiwasan ang pinsalang dulot ng Bagyong Opong na kasalukuyang tumatahak sa bahagi ng Bicol region.
“Kailangan ang paghahanda upang maging ligtas tayo. Kailangan ng plano at tamang pag-manage ng disaster to reduce the effects of the disasters,” pahayag ng arsobispo sa Radyo Veritas.
Bagamat lumihis ang track ng bagyo sa Camarines Sur, partikular sa Naga City, muling nanawagan si Archbishop Alarcon sa mga residente na manatiling alerto at sundin ang mga kautusan ng kanilang local government units at disaster risk management offices.
Bilang bahagi ng paghahanda, binuksan ng Arkidiyosesis ng Caceres ang mga simbahan at paaralan upang magsilbing evacuation centers para sa mga pamilyang nakatira sa mababang lugar na lantad sa pagbaha at pagguho ng lupa.
“Sa ngayon nga, may mga pamilya nang pansamantalang nasa loob ng ating mga simbahan,” dagdag ng arsobispo.
Nagbigay din si Archbishop Alarcon ng paalala ukol sa mga dapat ihanda tulad ng emergency kits na may pagkain, gamot, ilaw, at fully charged na cellphone habang hinihikayat ang lahat na magtulungan sa gitna ng sakuna.
“Mas mabuti ang pag-iingat at risk management kaysa magsisi sa huli…an ounce of prevention is better than a pound of cure. Kaya pakiusap ko, magtulungan po tayo para sa kaligtasan ng lahat,” ani Archbishop Alarcon.
Bukod sa praktikal na paalala, pinangunahan din ng arsobispo ang panalangin para sa kaligtasan ng bawat isa.
“Mapagmahal na Ama, kami dumudulog sa Iyo dala ang aming mga pangamba dahil sa Bagyong Opong. Tulungan Mo po ang bawat isa sa amin, lalo na ang mahihina, ang mga malayo, at ang walang kakayahan. Iligtas Mo kami sa anumang panganib.”
Ayon sa PAGASA, unang nag-landfall ang Bagyong Opong sa San Policarpo, Eastern Samar, at muling tumama sa Masbate. Nakahanda na rin ang mga social action centers ng mga diyosesis na direktang maaapektuhan upang tumulong sa mga residente.
