3,428 total views
Pinaalalahanan ni Manila Archbishop Jose Cardinal Advincula ang mga kasapi ng militar na huwag lamang manatili bilang tagapagtanggol ng bansa kundi maging tagapagtatag ng kapayapaan at saksi ng pananampalataya.
Sa kanyang homiliya sa concluding Mass ng 60th General Assembly and Annual Conference ng Apostolat Militaire International (AMI), binigyang-diin ng kardinal ang mahalagang misyon ng mga military diocese sa buong mundo.
“You are not just defenders of nations. You are also builders of peace, witnesses of faith, and servants of Christ,” ani Cardinal Advincula.
Pinuri rin niya ang AMI dahil sa pagpapatibay ng Christian values sa mga unipormadong kawani, pagsusulong ng dayalogo sa pagitan ng mga bansa, at paghubog ng mga lider na may malasakit at integridad.
Binigyang-diin ng arsobispo ang tinatawag na biblical leadership na nakaugat sa pananampalataya at malasakit.
“Biblical leadership means putting God first, living with integrity, leading with compassion, and serving with humility. It means being builders, not of walls that divide, but of bridges that unite,” dagdag pa niya.
Aminado si Cardinal Advincula na mabigat ang hamon ng mga sundalo at kapulisan sa pagtupad ng tungkulin, ngunit nananatili silang matatag.
“Your resilience is not just physical; it is also spiritual — the ability to rise after failures, to forgive after pain, to hope after loss,” giit niya.
Hinikayat ng arosbispo ang mga kasapi ng AMI na dalhin si Kristo sa bawat kampo, peacekeeping mission, at pakikipag-ugnayan sa kapwa.
“Build the house of the Lord in every military camp, every peacekeeping mission, every heart you encounter,” ani ng kardinal.
Kasama ni Cardinal Advincula sa banal na misa si Military Bishop Oscar Jaime Florencio at Bishop Paul Mason ng Military Ordinariate of Great Britain.
Ngayong taon, ikatlong pagkakataon na ang Pilipinas ang naging host ng AMI gathering kabilang na noong 1997 at 2011.
Dumalo sa kumperensiya ang humigit-kumulang 70 delegado mula sa 15 bansa, kabilang ang 24 na kinatawan mula sa Pilipinas. Tema ng pagtitipon ang: “AMI @60 in the 2025 Jubilee Year: Strengthening Christian Values within the Armed Forces Worldwide through Biblical leadership, building bridges and increased resilience.”
