3,313 total views
Magkakaroon ng wreath-laying ceremony sa Port of Jagna, Bohol sa darating na September 28, 2025 bilang pagpupugay sa mga seafarers na nasawi sa dagat at bilang pagkilala sa lahat ng migrante at Overseas Filipino Workers (OFWs), aktibo man o hindi.
Ayon kay Fr. Jose Conrado Estafia, Diocesan Migrant Director ng Diocese of Talibon: “Adunay wreath-laying nga mahitabo didto sa Port sa Jagna karong September 28, 2025—paghalad og mga pag-ampo ug mga bulak alang sa mga seafarers nga nangamatay sa dagat.”
Bilang bahagi ng programa, isang banal na misa ang isasagawa ganap na alas-dos ng hapon sa loob mismo ng pantalan bago ang pag-aalay ng bulaklak.
Inaanyayahan ng pari ang mga pamilya at kaanak ng mga seafarers, migrante at OFWs na makiisa bilang tanda ng pakikiisa at pasasalamat sa kanilang sakripisyo.
Kasabay nito, ipagkakatiwala rin sa Mahal na Birheng Maria, Stella Maris—patron ng mga mandaragat at OFWs—ang lahat ng kanilang paglalakbay at paghihirap.
Ito ay inisyatibo ng Parish Pastoral-Spiritual Care of Migrants, Itinerants and OFWs (PASCO-MI OFW) ng Diocese of Talibon, katuwang ang Philippine Ports Authority–Port Management Office Bohol (PPA PMO-Bohol).
Itinatampok ito sa pagdiriwang ng 39th National Migrants’ Sunday at 30th National Seafarers’ Day, na kabahagi ng 26th National Maritime Week.
Tema ng selebrasyon ngayong taon ang “Migrants, Missionaries of Hope,” na hango sa paggunita ng Jubilee Year of Hope ng Simbahang Katolika.
Batay sa datos ng Philippine Statistics Authority (PSA) at Department of Migrant Workers (DMW), umabot sa US$38.3 bilyon o katumbas ng ₱2.2 trilyon ang ipinadalang remittances ng mga OFW noong 2024—patunay ng kanilang malaking ambag sa ekonomiya ng bansa at sa kinabukasan ng kanilang mga pamilya.
