4,006 total views
Umabot sa mahigit 4,000 indibidwal ang pansamantalang kinalinga ng mga parokya at simbahan sa ilalim ng Archdiocese of Caceres matapos ang pananalasa ng Bagyong Opong.
Batay sa datos ng arkidiyosesis, nasa kabuuang 939 pamilya o 4,180 indibidwal ang nanuluyan sa 18 parokya at institusyon na nagsilbing evacuation centers sa iba’t ibang bayan ng Camarines Sur.
Kabilang sa may pinakamaraming evacuees ang St. Francis of Assisi Parish sa Buhi na umabot sa 134 pamilya o 501 indibidwal, Our Lady of the Assumption Parish sa Canaman na may 104 pamilya o 445 indibidwal, at Holy Rosary Major Seminary sa Naga City na tumanggap ng 57 pamilya o 309 indibidwal.
Ayon kay Caritas-Caceres executive director, Fr. Marc Real, maagang naghanda ang arkidiyosesis matapos ang paunang abiso na daraanan ng Bagyong Opong ang Camarines Sur.
“Two days ago, ang forecast ay tatamaan kami [Camarines Sur], kaya grabe ang paghahanda. Marami ang evacuees sa parishes na nag-seek ng temporary shelter,” pagbabahagi ni Fr. Real sa panayam ng Radyo Veritas.
Dagdag pa ni Fr. Real, nagbago ang direksyon ng bagyo at dumaan sa katimugang bahagi ng Bicol Region kaya hindi gaanong naapektuhan ang lalawigan.
Dahil dito, nagsimula nang magsiuwian ang ilang evacuees, bagamat nagpapatuloy pa rin ang monitoring ng Caritas Caceres lalo sa Rinconada district na mas malapit sa diameter ng bagyo.
Nagpasalamat naman ang Archdiocese of Caceres sa lahat ng pari, volunteers, at mananampalatayang nagpakita ng malasakit at bukas-palad na pagtulong sa mga nasalanta.
“Let us continue to pray for everyone’s safety and for the swift recovery of our communities,” ayon sa arkidiyosesis.
