22,233 total reads
Nanawagan si Archbishop Romulo Valles ng Archdiocese of Davao ng isang special collections sa lahat ng parokya at kapilya bilang tulong para sa mga biktima ng malakas na lindol na tumama sa Cebu noong gabi ng Setyembre 30, 2025.
Sa kanyang pahayag, sinabi ni Archbishop Valles na ang malakas na lindol ay nagdulot ng malaking pinsala, pagkawala ng buhay, at nag-iwan ng libo-libong pamilyang nangangailangan ng agarang tulong.
Bilang tugon, inatasan ng Arsobispo ang lahat ng kura paroko at chaplain ng mga kapilya na magsagawa ng special collection sa lahat ng Misa — kabilang ang anticipated Masses — ngayong Linggo, Oktubre 5, 2025.
Ang lahat ng malilikom ay agad na ipapadala sa Finance Office ng Archdiocese of Davao para maipadala kaagad sa Archdiocese of Cebu.
Bukod sa koleksyon, maaari ring magbigay ng cash donations ang mga indibidwal at institusyon.
Ang mga makakalap na kontribusyon ay maaaring idiretso sa calamity fund account ng Archdiocese of Davao sa BDO Davao – Woodlane Diversion Road branch, sa pangalan ng The Roman Catholic Bishop of Davao, Inc., may account number na 01407013680. Maaari ring dalhin ang mga donasyon sa Finance Office ng Archbishop’s Residence sa F. Torres Street, Davao City.
“I am deeply grateful for your immediate and generous response to this call of solidarity with our brothers and sisters in Cebu,” ayon pa kay Archbishop Valles.
Tiniyak ng arsobispo na ang lahat ng malilikom na donasyon ay agad na ipapadala sa Archdiocese of Cebu upang makatulong sa agarang pangangailangan ng mga nasalanta.
Sa pinakahuling ulat, umaabot na 72 katao ang nasawi sa 6.9 magnitude na lindol sa lalawigan ng Cebu kung saan ang pinakasentro ay naganap sa Bogo City.
