48,226 total reads
Nagpahayag ng pagdadalamhati ang Catholic Bishops’ Conference of the Philippines – Episcopal Commission on Indigenous Peoples (ECIP) sa pagpanaw ni Fr. Ewald “Amang” Dinter, SVD.
Si Fr. Dinter ay isang German missionary na kilala sa kanyang panghabambuhay na paglilingkod at pakikiisa sa mga pamayanang katutubo, lalo na sa mga Mangyan ng Mindoro.
Pumanaw ang pari dakong alas-9:07 ng gabi noong Biyernes, November 14, 2025, sa University of Santo Tomas (UST) Hospital sa Maynila.
Ayon kay CBCP-ECIP outgoing chairman, Bontoc-Lagawe Bishop Valentin Dimoc, isang tunay na misyonero si Fr. Dinter na inilaan ang buhay sa pagtataguyod ng dignidad, karapatan, at kultura ng mga katutubo.
“His gentle presence, deep humility, and unwavering solidarity earned him the trust, affection, and lasting gratitude of the communities he served,” pahayag ni Bishop Dimoc.
Nagsilbi si Fr. Dinter bilang Executive Secretary ng CBCP-ECIP mula 2010 hanggang 2013, at bilang Indigenous Peoples Apostolate South–Central Luzon Regional Coordinator mula 1993 hanggang 2010.
Nahalal rin siya bilang Provincial Superior ng SVD Philippines noong 1979 at nanatiling pinuno ng Central Province matapos hatiin ang SVD sa tatlong probinsya noong 1982. Sandali rin siyang naging Rector ng Christ the King Seminary habang nananatiling provincial councilor.
Noong 1986, tuluyang inialay ni Fr. Dinter ang kanyang sarili sa paglilingkod sa mga Mangyan, kung saan matagal siyang namuhay kasama nila, nagturo, nagtaguyod ng edukasyon, itinatag at pinamunuan ang Mangyan Education Center, at kalaunan ay hinirang bilang Episcopal Vicar para sa Mangyan Missions.
“His life and witness continue to inspire our ministry among Indigenous Peoples throughout the country. We give thanks to God for the gift of Amang Dinter’s life. May he now rest in the peace of the Creator whom he served so faithfully,” ayon kay Bishop Dimoc.
