59,748 total reads
Pangulong Marcos sa ika-162 kaarawan ni Gat. Bonifacio:
“Isapuso ang tungkuling wala nang hihigit pa sa pag-ibig sa Inang Bayan”
Muling iginiit ni Pangulong Ferdinand Marcos Jr. na nanatiling simbolo ng tapang at pagkakaisa ng Filipino si Gat Andres Bonifacio.
Ito ang mensahe ng Pangulo kasabay na rin ng pagdiriwang ng buong bansa ng ika-162 kaarawan ng tanyag na bayani ng bansa.
Ayon sa Pangulo, tinuruan ni Bonifacio ang mamamayan ng bansa na lumaban sa pang-aapi at pahalagahan ang kalayaan.
“Bagaman higit isang siglo na ang nakalipas, patuloy siyang nagbibigay-inspirasyon sa bawat isa sa atin, at pinangingningas rin ng kanyang alaala ang ating determinasyong pangalagaan ang kasarinlan kanyang ipinaglaban noon at ating pinahahalagahan ngayon,” ayon sa mensahe ng Pangulong Marcos.
Gayundin ang pagbibigay halaga sa naging tungkulin ng Katipunan na itinatag ni Bonifacio upang makamit ang kasarinlan ng bansa.
Sinabi ng Pangulo na ang tunay na kabayanihan ni Bonifacio ay nakaugat sa kanyang pagmamahal sa bayan at sa paghahangad ng mas magandang kinabukasan para sa mga Pilipino.
Kaya’t panawagan ang Pangulo na ipagpatuloy ng bawat mamamayan ang malasakit sa bayan at ang pakikipagtulungan para sa isang maunlad at mapayapang Pilipinas.
Ayon pa kay Pangulong Marcos, “Tulad ni Gat Andres, pangalagaan natin ang ating dangal at manatiling puspos ng kadakilaan sa mga gawaing para sa ikabubuti ng lahat. Buong-lugod nating isapuso ang tungkuling wala nang hihigit pa sa pag-ibig sa ating Inang Bayan.”
Kasabay nito, nagtitipon naman sa kasalukuyan ang maraming mga Pilipino sa Edsa People Power Monument at sa Luneta, bilang pagtutol ng mamamayan laban sa umiiral na katiwalian sa bansa.
Ang pagkilos sa Edsa o ang Trillion Peso March na pinapangunahan ng simbahan, ay suportado ng 86 na diyosesis at arkidiyosesis sa bansa, kung saan sabay na ginaganap ang pagkilos sa iba’t ibang lugar sa Luzon, Visayas at Mindanao.
