46,933 total reads
Hinikayat ni House Speaker Faustino Dy III ang kapwa mambabatas, maging ang mga kawani ng House of Representatives na makiisa para maibalik ang tiwala ng publiko sa institusyon at maihatid ang reporma na kinakailangan ng mamamayan.
Ito ang mensahe ni Dy, sa flag raising ceremony sa Batasan Complex kaugnay na rin sa kinakaharap na hamon ng Kamara na maisasakatuparan lamang kung sama-samang kikilos tungo sa pagbabago.
“Mga kasama, malinaw ang hamon sa ating lahat: Magkaisa. Magtulungan. Isantabi ang pansariling interes para sa kapakanan ng mamamayang Pilipino,” ayon kay Speaker Dy.
Hiling ng mambabatas sa bawat isa na manatiling nakatuon sa kapakanan ng mamamayang Pilipino.
Giit pa ng pinuno ng Kamara, “Kayang-kaya nating itayo ang isang Kongresong tapat, makatao, makabayan, at tunay na nagsisilbi. Kayang-kaya nating maging instrumento ng pagkakaisa at paghilom ng ating bayan.”
Hinimok din ni Dy ang mga mambabatas at kawani na huwag magpaapekto sa ingay ng pulitika at maling impormasyon na maaring makagambala sa kanilang tungkulin.
“Hinihikayat ko kayo: huwag nating hayaang maapektuhan tayo ng mga naririnig o nababasa sa social media. Kayang-kaya nating baguhin ang imahe ng institusyong ito sa pamamagitan ng tapat, masipag, at makabuluhang paglilingkod,” ayon pa kay Dy.
Umaasa ang Speaker na sa mga susunod na panahon ay mababawi rin ng Kamara ang paggalang at nararapat na dignidad sa institusyon.
Una na ring nahaharap sa kontrobersya ang Kongreso, dahil sa pagkakasangkot ng mga ilang mga mambabatas sa flood control anomalies, at sinasabing ‘insertions’ sa 2025 budget.
Ang mga alegasyon ng malawakang katiwalian sa gobyerno ang dahilan ng isinasagawang serye ng protesta ng publiko na nanawagan ng pananagutan ng lahat ng sangkot sa katiwalian.
Kabilang din sa panawagan ng isinagawang Trillion Peso March sa Edsa ang pagpasa ng panukala kaugnay sa political dynasty.
Kamakailan lang ay inanunsyo ni Dy-na ang angkan ay bahagi ng dinastiya, ay nagpahayag ng suporta sa pagsusulong ng anti-dynasty bill, na matagal nang nakabinbin sa Kamara.
