42,928 total views
Binigyang-diin ni Taytay Bishop Broderick Pabillo na ang binyag ay hindi lamang seremonyang panrelihiyon kundi malinaw na panawagan sa mga Kristiyano na makiisa sa misyon ni Hesus tulad ng pagsusulong ng katarungan at pagmamalasakit sa kapwa.
Sa kanyang homiliya sa Kapistahan ng Pagbibinyag ng Panginoon, ipinaliwanag ng obispo na bagamat walang kasalanan si Hesus, pinili nitong magpabinyag bilang tanda ng pakikiisa sa makasalanang kalagayan ng tao.
Ayon kay Bishop Pabillo, ang binyag ni Hesus ay nagsilbing simula ng kanyang misyon para sa mundo.
“Ang ating binyag ay hindi lang ang pagtanggal ng ating kasalanan. Ito ay ang simula ng ating misyon na makiisa sa misyon ni Jesus,” ayon kay Bishop Pabillo.
Ipinaliwanag din ni Bishop Pabillo na sa pagbibinyag kay Hesus sa Ilog Jordan, hindi si Hesus ang nilinis ng tubig kundi ang tubig ang binigyan ng kapangyarihang maglinis ng kasalanan ng tao sa pamamagitan ng sakramento ng binyag.
“Hindi siya ang nilinis ng tubig, pero ang tubig ang binigyan niya ng kapangyarihan na maglinis ng ating kasalanan,” ani Bishop Pabillo.
Binigyang-diin ng obispo ang uri ng katarungang isinasabuhay ni Hesus na isang katarungang hindi marahas kundi mapagkalinga at mahinahon.
Dagdag pa ng obispo, ang misyon ni Hesus ay malinaw na nakatuon sa mga naaapi at isinasantabi ng lipunan kabilang ang mga dukha.
Hinamon naman ni Bishop Pabillo ang mga mananampalataya na suriin ang kanilang katapatan sa binyag sa gitna ng kasalukuyang kalagayan ng lipunan.
Nanawagan din siya ng konkretong pagkilos upang maging liwanag sa mundong binabalot ng alitan at kawalan ng malasakit.
“Hanggang ngayon natutuwa pa rin ba ang Diyos sa atin? Nananatili ba tayong tapat sa ating binyag? Madilim ang mundo dahil sa alitan. Dalhin natin ang liwanag ng pagmamalasakit sa kapwa,” ani Bishop Pabillo.
Binigyang-diin ng obispo na tulad ni Hesus, ang bawat binyagan ay may misyon, ang makiisa sa gawain ng Panginoon sa pagpapanibago ng lipunan sa pamamagitan ng kabutihan, katarungan, at malasakit sa kapwa.
