32,646 total views
Mariing nanawagan ang Diyosesis ng Bayombong sa mga lokal na opisyal ng pamahalaan na agarang magpalabas ng Cease and Desist Order laban sa isinasagawang mining exploration ng Woggle Mining Corporation sa Dupax del Norte, Nueva Vizcaya.
Ito ay kasabay ng kasalukuyang pagpapatupad ng Writ of Preliminary Injunction sa barikada sa Barangay Bitnong na nag-uutos sa mga residente na gibain ang kanilang barikada sang-ayon sa mining company.
Ayon sa diyosesis, ang nasabing hakbang ay isang seryosong banta sa patuloy na pagtatanggol ng komunidad sa buhay, lupa, at kalikasan.
“The Bishop and the entire Diocese once again call on public officials—who are entrusted with authority and solemnly bound to defend and protect the common good—to intervene immediately and decisively. The situation demands action, not delay; courage, not silence,” pahayag ng Diyosesis ng Bayombong.
Noong January 9, 2026, kasabay ng Kapistahan ng Mahal na Poong Jesus Nazareno, nagsumite ng pormal na apela si Bayombong Bishop Jose Elmer Mangalinao sa tanggapan nina Nueva Vizcaya Governor Jose Gambito at Dupax del Norte Mayor Paolo Cayton.
Sa kanyang liham, hinimok ng obispo ang mga opisyal na maglabas ng Cease and Desist Order laban sa operasyon ng Woggle Mining Corporation.
Layunin ng panawagan na bigyang-daan ang isang patas at masusing imbestigasyon, mapangalagaan ang karapatan ng mga residente, at maiwasan ang posibleng pinsala sa kalikasan at mga paglabag sa karapatang pantao.
Nagpadala rin ng magkakahiwalay na apela ang diyosesis kina Vice Governor Eufemia Dacayo at sa Sangguniang Panlalawigan, gayundin kina Vice Mayor RR Asuncion at sa Sangguniang Bayan ng Dupax del Norte, upang suportahan ang panawagan at manindigan sa panig ng mga apektadong komunidad.
“We are now awaiting their urgent and public response. At this critical moment, we call on our leaders to choose the people over profit, justice over expediency, and life over destruction,” saad ng Diyosesis.
Kasabay nito, hinikayat ng diyosesis ang mga mananampalataya, civil society organizations, environmental defenders, at lahat ng mamamayan na manatiling mapagmatyag, magsalita, at patuloy na makiisa sa mga komunidad ng Barangay Bitnong.
Giit ng Diyosesis ng Bayombong, ang usapin ng pagmimina sa Dupax del Norte ay hindi lamang isang lokal na usapin kundi isang moral at panlipunang pananagutan na dapat harapin ng lahat.
“Let us remain united. Let us stand firm for the land, the people, and the future,” giit ng diyosesis.
