29,870 total reads
Pinangunahan ng development at advocacy arm ng Catholic Bishops’ Conference of the Philippines ang panawagan para sa mas malalim at sama-samang pagtugon sa krisis sa kalikasan, kahirapan, at pamamahala.
Ito ay sa pamamagitan ng tatlong araw na pagtitipon sa University of Santo Tomas mula January 14-16, 2026, kaugnay ng palulunsad sa Hayuma: Mending the Broken, na naglalayong pagdugtungin ang ekolohiya, ekonomiya, at karapatang pantao.
Ayon sa Caritas Philippines, ang hayuma—salitang Bisaya na tumutukoy sa kolektibong pag-aayos ng napunit na lambat ng mangingisda—ay sumasagisag sa paraan ng pagtugon ng Simbahan sa mga pamayanang paulit-ulit na naaapektuhan ng sakuna.
Binigyang-diin ng institusyon na ang mga kalamidad ay hindi hiwalay sa mas malalim na suliranin ng bansa.
“Disasters reveal not only broken houses and damaged livelihoods, but broken systems of protection, decision-making, and care. When governance fails, when economic life is fragile or unjust, and when the environment is treated as expendable, the net tears early and repeatedly, especially for the poor and themarginalized,” ayon sa Caritas Philippines.
Nakaugat ang Hayuma sa matagal nang paninindigan ng Simbahan sa integral ecology, mula sa Asilo Conference noong 2015 hanggang sa mga direktiba ng CBCP na humihikayat ng ecological conversion, divestment mula sa mapaminsalang industriya, at pagtataguyod ng zero-waste at renewable energy sa mga institusyon ng Simbahan.
Sa ilalim ng Laudato Si’ Convergence, katuwang ng Caritas Philippines ang 13 komisyon ng CBCP at iba’t ibang organisasyong panlipunan upang tiyaking ang mga diyosesis at komunidad ay hindi lamang tagatanggap ng tulong, kundi aktibong kalahok sa pagdedesisyon at pangangalaga sa kalikasan.
Iginiit ng Caritas Philippines na hindi sapat ang agarang relief at rehabilitation kung hindi tutugunan ang ugat ng kahinaan ng mga komunidad.
“Hayuma calls us not only to recovery, but also to mitigation and prevention. To hayuma is to strengthen the net before it tears again. It means addressing the conditions that place communities at risk, including environmental degradation, economic systems that leave people behind, and governance that excludes communities from decisions affecting their lives,” giit ng institusyon .
Sinabi ng Caritas Philippines na ang ekonomiya ay dapat maglingkod sa buhay at dignidad ng tao, sapagkat hindi maaaring isakripisyo ang kalikasan at ang mahihirap sa ngalan ng paglago.
“The future is woven slowly, collectively, and responsibly, people, peace, livelihood, and the earth, thread by thread, together,” ayon sa Caritas Philippines.
