32,865 total reads
Binigyang-diin ni Legazpi Bishop Joel Baylon ang kahalagahan ng diwa ng EDSA People Power Revolution sa kasalukuyang panahon, lalo na para sa mga kabataan.
Ayon sa Obispo, nananatiling buhay ang pag-asa at diwa ng EDSA People Power Revolution na naganap 40-taon na ang nakakalipas noong 1986.
Sa kanyang pagninilay, binigyang-diin ni Bishop Baylon na ang pag-asa ng sambayanan ay nakaugat sa presensya ng Espiritu Santo na nananatili sa bansa magpahanggang sa ngayon.
Paliwanag ng Obispo, ang tunay at pangmatagalang pagbabago ay hindi lamang nagsisimula sa lansangan kundi sa puso ng bawat isa.
“We believe that there is hope, and hope just not disappoint, because hope is pounded on the gift of the Holy Spirit and the Holy Spirit remains with us, EDSA [People Power Revolution] remains with us.” Bahagi ng pagninilay ni Bishop Baylon.
Pagbabahagi ni Bishop Baylon, ang EDSA ay hindi lamang isang pangyayari sa kasaysayan kundi isang patuloy na paanyaya sa bawat Pilipino na magsimula ng pagbabago sa sarili.
Bilang pagpapatuloy sa diwa ng EDSA People Power Revolution hinimok ng Obispo ang mga mananampalataya na isabuhay ang parehong tapang at paninindigan para sa katotohanan sa lipunan upang makamtan ang tunay na pagbabago at pag-unlad ng bansa.
“Let us begin with ourselves EDSA [People Power Revolution] begun in that way, in the heart of every person who went there to face the tanks, to proclaim the truth, and to be instruments of peace. Let us do that, that there may be real change, real progress in this beloved country that we called the Philippines. Power belongs to the people, transparency, accountability, and liberty are the true lessons of EDSA [People Power Revolution].” Dagdag pa ni Bishop Baylon.
Pinaalalahanan din ng Obispo ang mga mananampalataya na ang diwa ng EDSA ay nananatiling hamon at inspirasyon na isa ring paanyaya sa patuloy na paninindigan para sa katotohanan, pananagutan, at kalayaan para sa lahat.
Sa pamamagitan ng isinagawang “March of Heroes” sa Albay Cathedral noong ika-25 ng Pebrero, 2026 ay isinabuhay ng mga kabataang Katoliko mula sa iba’t ibang paaralan at samahang pansimbahan ng Diyosesis ng Legazpi ang mga pambansang bayani, mga pangunahing personalidad ng EDSA People Power Revolution, at mga makabagong saksi ng pananampalataya.
Matapos ang isinagawang pagmamartsa, naghandog ang mga kalahok na grupo ng malikhaing presentasyon sa pamamagitan ng kasuotan, at pagtatanghal upang bigyang-diin ang diwa ng EDSA People Power Revolution na kalayaan, katotohanan, at lakas ng loob na manindigan para sa tama.
Sinundan naman ito ng pagdiriwang ng Banal na Misa na pinangunahan ni Bishop Baylon kung saan hinamon rin ng Obispo ang mga kabataan na isabuhay ang diwa ng People Power sa pang-araw-araw na buhay sa pamamagitan ng paninindigan para sa katotohanan, pagtanggi sa kasinungalingan at maling impormasyon, at pagiging instrumento ng pag-asa, katarungan, at kapayapaan sa lipunan.
Sa paggunita sa ika-40 taon ng EDSA People Power Revolution, ipinakita ng kabataan ng Legazpi na ang diwa ng pagkakaisa at mapayapang pagkilos ay patuloy na nabubuhay sa bagong henerasyon ng Simbahan.
