18,560 total views
Iginiit ng Bayay Sibuyanon, Inc. na hindi lisensya sa pagmimina ang naging desisyon ng Korte Suprema sa kaso kaugnay ng operasyon ng Altai Philippines Mining Corporation sa Sibuyan Island.
Ayon sa grupo, ang pagsasantabi sa Petition for Writ of Kalikasan ay nakabatay lamang sa procedural requirements ng Rules of Procedure for Environmental Cases at hindi nangangahulugang ligtas o walang paglabag ang pagmimina.
Binigyang-diin ng Bayay Sibuyanon na nananatili ang Notices of Violation mula sa Department of Environment and Natural Resources, cease and desist sa causeway project, pansamantalang suspensyon ng Ore Transport Permit, at kusang paghinto ng operasyon noong 2023, bukod pa sa patuloy na pagtutol ng mga lokal na pamahalaan at residente ng isla.
“Ang mga hakbang na ito ay patunay na may seryosong isyu sa environmental compliance na hindi maaaring maliitin o balewalain,” giit ng Bayay Sibuyanon.
Ikinababahala rin ng grupo ang mahigit isang taong hindi pagtugon ng DENR sa nakabinbing petisyon para kanselahin ang Mineral Production Sharing Agreement o MPSA ng Altai, na inihain dahil sa mga alegasyon ng paglabag sa environmental at regulatory requirements.
Babala ng samahan, habang nananatiling walang malinaw na resolusyon ang petisyon, nananatiling bukas ang posibilidad ng pagbabalik-operasyon ng mina at panibagong banta sa biodiversity ng Sibuyan Island.
“Ang pagmimina sa ganitong lugar ay may malalim at pangmatagalang implikasyon sa kagubatan, kabundukan, ilog, at karagatan ng isla, at sa kabuhayan at seguridad ng mga komunidad,” ayon sa Bayay Sibuyanon.
Hinimok ng Bayay Sibuyanon ang DENR na agarang tugunan ang petisyon para sa kanselasyon ng MPSA, tiyakin ang malinaw at bukas na proseso, at higit na unahin ang pangangalaga ng kalikasan at kapakanan ng pamayanan kaysa sa anumang interes ng pagmimina.
Paninindigan ng grupo, hindi dapat pahintulutan ang large-scale metallic mining sa isang marupok at maselang likas-yaman tulad ng Sibuyan, at magpapatuloy ang kanilang laban para sa katarungang pangkalikasan at pananagutan.
Sa Laudato Si’, mariing nagpahayag si Pope Francis ng pagtutol sa pagmimina dahil nagdudulot ito ng labis na pinsala sa kalikasan at paghihirap sa mga apektadong pamayanan.
