251 total views
Inilaan ng Kanyang Kabanalan Pope Leo XIV ang kanyang prayer intention ngayong buwan ng Marso para sa pagsusulong ng disarmament at kapayapaan sa gitna ng patuloy na sigalot at karahasan sa iba’t ibang panig ng mundo.
Partikular na nanawagan ang Santo Papa sa mga bansa at mga pinuno ng pamahalaan na tahakin ang landas ng dayalogo at diplomasya sa halip na dahas at pagpapalakas ng sandata.
Sa gitna ng pangamba at kawalan ng katiyakan, muling ipinapaalala ni Pope Leo XIV na ang pag-asa ay nananatili sa sama-samang pagkilos para sa kapayapaan na nakaugat hindi sa pananakot, kundi sa pagkilala sa iisang sangkatauhan.
“Let us pray that nations move toward effective disarmament, particularly nuclear disarmament, and that world leaders choose the path of dialogue and diplomacy instead of violence.” Panalangin ng Santo Papa para sa buwan ng Marso.
Napapanahon din ang inilaang prayer intention ni Pope Leo XIV ngayong buwan lalo na sa usapin ng nuclear disarmament sa panahon ng umiigting na tensyon sa pagitan ng Israel at Palestine, at sa iba pang bahagi ng rehiyon sa Gitnang Silangan na apektado ng alitan.
Paliwanag ng Santo Papa, ang tunay na seguridad ng mundo ay hindi nakasalalay sa lakas ng armas kundi sa pagkakaroon ng tiwala, paggalang sa dignidad ng bawat tao, at tapat na pakikipag-usap upang maresolba ang mga hindi pagkakaunawaan ng mga bansa.
Bahagi rin ng panawagan ni Pope Leo XIV ang paninindigan ng bawat mananampalataya na maging instrumento ng kapayapaan sa kani-kanilang komunidad, lalo na sa panahong marami ang nababalot ng takot at kawalan ng katiyakan dulot ng digmaan at banta ng mas malawak na kaguluhan.
Una nang binigyang-diin ng Santo Papa na ang kapayapaan ay bunga ng makatarungan at responsableng pagpapasya, at ang mundo ay higit na nangangailangan ng mga pinunong may lakas ng loob na unahin ang buhay at kinabukasan ng sangkatauhan kaysa sa interes ng karahasan at kapangyarihan.
