409 total reads
Hinimok ni Davao Archbishop Romulo Valles ang mga mananampalataya na pagnilayan ang kabutihan ng Diyos at ibahagi ito sa kapwa lalo sa paglalakbay ng pananampalataya ngayong panahon ng Kuwaresma.
Sa kanyang pagninilay sa Misa na ginanap sa San Pedro Cathedral, nitong Miyerkules, ipinaalala ng arsobispo na ang Kuwaresma ay panahon upang mas lalong mapalapit ang bawat Kristiyano sa Panginoon.
“One way to see that we are close to the Lord is to remember the works of the Lord. To list down the goodness of the Lord,” bahagi ng pagninilay ni Archbishop Valles.
Paliwanag ng arsobispo na madalas mas madaling ilista ng tao ang mga kahilingan at pangangailangan sa Diyos, ngunit mas mahalagang alalahanin ang mga pagkakataong naranasan ang Kanyang kabutihan.
“Ingon ang readings karon, to be able to remember how good the Lord has been to you. To list down the goodness of the Lord,” dagdag ng arsobispo.
Ayon sa arsobispo, ang ganitong pagninilay ay makatutulong upang mas makita ng tao ang presensya ng Diyos sa kanilang buhay at maging daan upang higit na mapalalim ang kanilang ugnayan sa Panginoon.
Bukod sa personal na paggunita sa kabutihan ng Diyos, hinikayat din ni Archbishop Valles ang mga mananampalataya na ibahagi ito sa iba bilang paraan ng pagpapahayag ng pananampalataya.
“Tell others how good the Lord is… Not only remembering, but teaching. Tell people how good the Lord is,” ani ng arsobispo.
Dagdag pa ng arsobispo na hindi kailangang maging pormal na pangangaral ang pagbabahagi ng pananampalataya kundi maaari itong gawin sa simpleng pakikipag-usap sa pamilya, mga kaibigan at maging sa mga kasamahan sa trabaho.
Sa naturang Misa ay ipinagkatiwala rin ng arsobispo sa Panginoon ang iba’t ibang intensyon ng mga mananampalataya, kabilang ang panalangin para sa pamilya ng dating Pangulong Rodrigo Duterte na kasalukuyang nakapiit sa The Hague, Netherlands, isang taon ang nakalilipas.
Binigyang-diin din ng arsobispo na ang bawat panalangin at kahilingan ng mga mananampalataya ay ipinagkakatiwala sa Diyos lalo na sa pagdiriwang ng Banal na Eukaristiya.
“We entrust that intention to the Lord, especially in this Eucharist,” ani Valles.
Kabilang sa mga dumalo sa banal na misa ang pamilya ng dating punong ehekutibo sa pangunguna ni Vice President Sara Duterte.
Hinikayat ng arsobispo ang mga mananampalataya na gamitin ang panahon ng Kuwaresma upang pagnilayan ang kabutihan ng Diyos sa kanilang buhay at maging saksi ng Kanyang pagmamahal sa kapwa habang nalalapit ang pagdiriwang ng mga Mahal na Araw.
