503 total views
Buong kababaang-loob na tinanggap ni Bishop-elect Gerardo Saco Jr. ang pagkatalaga sa kaniya bilang bagong Obispo ng Diyosesis ng Tagbilaran.
Ayon sa pari, ang pagkahirang na pastol sa diyosesis na may halos isang milyong kawan ay hindi bunga ng sariling kagustuhan kundi tugon sa tawag ng Diyos.
“This call is not mine personally, but a call from the Lord. And if it is the Lord who calls, then He will also provide the strength and the grace to fulfill this mission,” ayon kay Bishop-elect Saco.
Aminado ang pari na nakaramdam ito ng pangamba at pag-aalinlangan nang ipaalam ni Papal Nuncio to the Philippines, Archbishop Charles Brown, ang appointment sa kanya, ngunit binigyang-diin ang pagtitiwala sa biyaya ng Diyos na siyang magbibigay ng kakayahan upang magampanan ang misyong ipinagkatiwala sa kanya.
Sinabi ni Bishop-elect Saco na sa pamamagitan ng panalangin ay naging malinaw sa kanya ang tunay na pinanggagalingan ng tawag, kaya’t buong kababaang-loob niyang tinanggap ang bagong tungkulin.
“Therefore, in obedience to the will of God and in communion with the Holy Church, I humbly accept this appointment as the Bishop of Tagbilaran,” dagdag ng bishop-elect.
Binigyang-diin din ni Bishop-elect Saco na ang kanyang pagtanggap ay hindi nakabatay sa sariling kakayahan kundi sa kapangyarihan ng Diyos na kumikilos sa gitna ng kahinaan ng tao.
“I accept not because I am capable but because I believe that God can work even through my weakness,” aniya.
Ipinaalala rin ng bishop-elect na ang pagiging obispo ay hindi isang karangalan kundi isang misyon ng paglilingkod.
“Not fame, but a call to service, to love, to listen, and to guide the people of God in our diocese,” giit ni Bishop-elect Saco.
Humiling ang bagong talagang obispo ng panalangin mula sa mga mananampalataya upang magampanan niya ang kanyang tungkulin bilang pastol ng Simbahan.
“Pray for me, that I may be a faithful Shepherd who listens to God, who cares for the poor, who strengthens the weak, and who brings all closer to Christ,” panawagan niya.
Umaasa rin ang bishop-elect sa patuloy na pakikiisa ng kaparian at ng buong sambayanan ng Diyos upang higit pang mapatatag ang pananampalataya, pag-asa at pag-ibig sa diyosesis.
March 25 sa pagdiriwang ng Feast of the Annunciation nang hirangin siyang obispo ni Pope Leo XIV makalipas ang ilang buwang paninilbihang diocesan administrator ng Tagbilaran nang maging sede vacante mula September 2025.
