938 total views
Hinimok ng mga obispo ng Quezon Province ang mga opisyal ng pamahalaang panlalawigan na talikuran ang paggamit ng coal at pigilan ang pagtatayo ng mga bagong coal-fired power plant sa lalawigan, lalo na sa bayan ng Atimonan.
Sa liham na ipinadala sa gobernador at mga miyembro ng Sangguniang Panlalawigan, iginiit nina Lucena Bishop Mel Rey Uy, Gumaca Bishop Euginius Cañete, at Infanta Bishop Dave Capucao, ang agarang pagkilos ng mga lider sa gitna ng lumalalang krisis sa klima.
Ayon sa mga obispo, ang patuloy na pag-asa sa fossil fuel ay nagdudulot ng panganib sa kalikasan at kabuhayan ng mamamayan, lalo na sa gitna ng pabago-bagong sitwasyon sa pandaigdigang merkado ng enerhiya.
“As stewards of both public trust and God’s creation, everyone are collectively entrusted with the responsibility to act decisively in the face of the climate crisis, aggravated by the geopolitical conflict in the Middle East where Philippines’ deep fossil fuel-dependence jeopardizes the welfare of its consumers and the commons,” ayon sa pahayag.
Nagpahayag naman ng suporta ang Quezon for Environment (QUEEN) sa panawagan ng simbahan, at binigyang-diin ang pangangailangang pangalagaan ang mga komunidad, lalo na ang mahihirap at bulnerable.
Sinabi ni QUEEN Convenor, Fr. Warren Puno, hindi na dapat ipagpaliban ang paglipat sa malinis na enerhiya, at dapat itong maging pangunahing prayoridad ng pamahalaan at komunidad.
Ibinahagi naman ni Msgr. Emmanuel Villareal, isang paring taga-Atimonan, na matagal nang tinututulan ng mga residente ng Atimonan ang mga planong coal plant sa kanilang lugar, kasabay ng panawagan para sa mas malinis at ligtas na mapagkukunan ng enerhiya.
