8,336 total views
Inaanyayahan ng Philippine Conference on New Evangelization (PCNE) ang bawat mananampalataya sa nakatakdang PCNE 2026 sa darating na Hulyo.
Nakatuon ang PCNE 2026 sa temang ‘Go Forth. Share the Good News!’ na layuning bigyang halaga ang sama-samang paglalakbay ng Kristiyanong pamayanan sa pagsusulong ng Mabuting Balita ng Panginoon.
Nakatakda ang PCNE 2026 sa July 24 hanggang 26, 2026 sa University of Santo Tomas.
“Journey with us as we come together to be renewed, to be equipped, and to go forth as bold witnesses of the Gospel. Mark your calendars and spread the word” Bahagi ng paanyaya ng PCNE.
Layunin ng pagtitipon na pag-isahin ang mga mananampalataya sa iisang misyon ng pagpapalaganap ng pag-ibig ni Kristo, sa pamamagitan ng muling pagpapalalim ng pananampalataya at paghahanda bilang mga saksi ng Ebanghelyo.
Patuloy namang inaanyayahan ang lahat na sundan ang opisyal na Facebook page ng Philippine Conference on New Evangelization (PCNE) para sa iba pang detalye kaugnay ng PCNE 2026.
Unang isinagawa ang Philippine Conference on New Evangelization (PCNE) noong 2013 sa pangunguna ni Filipino Cardinal Luis Antonio Tagle ang kasalukuyang Pro Prefect ng Dicastery for Evangelization na noo’y ang arsobispo ng Arkidiyosesis ng Maynila bilang tugon sa panawagang New Evangelization ng Simbahang Katolika.
