597 total views
Itinalaga ni Pope Leo XIV si Bishop Louie Galbines bilang bagong obispo ng Diyosesis ng Bacolod kahalili ni Bishop Patricio Buzon na nagretiro matapos umabot sa itinakdang edad para sa mga obispo.
Sa edad na 59, muling babalik si Bishop Galbines sa diyosesis kung saan siya isinilang, naordinahan bilang pari, at naglingkod sa iba’t ibang mahalagang tungkulin bago naging obispo ng Kabankalan noong 2018.
Nagpasalamat ang lokal na simbahan ng Bacolod kay Bishop Buzon, na halos sampung taong namuno sa Bacolod at mahigit dalawang dekadang paglilingkod bilang obispo.
Ipinanganak si Bishop Galbines sa Sagay City, Negros Occidental noong 1966 at nagtapos ng pag-aaral sa pilosopiya at teolohiya sa University of Santo Tomas Central Seminary bago maordinahan bilang pari para sa Bacolod noong 1994.
Nagsilbi rin siya bilang rector ng Sacred Heart Seminary, vicar general ng Bacolod, at nagpatuloy ng mas mataas na pag-aaral sa Roma kung saan nagtamo ng doctorate sa sacred theology.
Taong 2018 nang italaga siya ni Pope Francis bilang obispo ng Kabankalan at inordinahan sa San Sebastian Cathedral sa Bacolod City noong May 28 ng nasabing taon.
