5,201 total reads
Patuloy na kinakaharap ng ilang komunidad sa General Santos City, Sarangani, at South Cotabato ang epekto ng magnitude 7.8 na lindol na yumanig sa Mindanao noong Hunyo 8, kabilang ang mga pagguho ng lupa, pagkasira ng mga tulay, kakulangan sa tubig at kuryente, at pinsala sa mga tahanan at pasilidad ng simbahan.
Batay sa Rapid Needs Assessment ng Social Action Center ng Diocese of Marbel, pinakamalubhang naapektuhan ang General Santos City kung saan naitala ang 13 nasawi, 144 sugatan, at apat na nawawala, habang tinatayang nasa halos 2,000 pamilya ang naapektuhan at mahigit 1,500 bahay ang nagtamo ng pinsala.
Aabot naman sa 66 imprastraktura sa lungsod ang nasira, kabilang ang mga paaralan, ospital, simbahan, establisimyento, at ang General Santos City International Airport.
Sa Sarangani, hindi bababa sa 11 kumpirmadong nasawi at mahigit 100 sugatan, habang higit sa 5,100 pamilya ang naapektuhan ng lindol at ng kasunod na tsunami alert.
Nananatiling hindi madaanan ang ilang pangunahing kalsada at tulay sa lalawigan, lalo na sa bayan ng Glan, habang limitado pa rin ang suplay ng tubig, kuryente, at komunikasyon sa ilang lugar.
Sa South Cotabato naman, tatlo ang nasawi at 203 ang nasugatan, habang naitala rin ang pinsala sa 112 gusali at imprastraktura at 432 bahay.
Una nang umapela ng agarang tulong si Marbel SAC Director Fr. Jerome Millan para sa mga pangangailangan ng mga apektadong pamilya, kabilang ang hygiene kits, solar lamps, maiinom na tubig, at pagkain.
Patuloy naman ang isinasagawang pangangalap ng datos at assessment ng Diocese of Marbel at mga lokal na pamahalaan upang matukoy ang kabuuang lawak ng pinsala at mapabilis ang pagtugon sa pangangailangan ng mga apektadong komunidad.
Batay naman sa pinakahuling ulat ng National Disaster Risk Reduction and Management Council (NDRRMC), umabot na sa 45 ang kumpirmadong nasawi, 630 ang sugatan, at 17 ang nawawala, habang halos 36,000 pamilya sa iba’t ibang bahagi ng Mindanao ang apektado ng pagyanig.
