9,570 total reads
Hinikaya ni Antipolo Bishop Ruperto Santos ang mga mananampalataya na gawing sentro ng pananalangin, pananampalataya, at pilgrimage ang bagong Holy Spirit Church sa Barangay Dolores, Taytay, Rizal kasunod ng Blessing of the Altar at Solemn Declaration ng simbahan sa ilalim ng Diocese of Antipolo.
Ayon kay Bishop Santos, ang bagong simbahan ay magiging lugar kung saan higit na mararanasan ng mga mananampalataya ang pag-ibig at awa ng Diyos sa pamamagitan ng pagdiriwang ng mga banal na sakramento, pananalangin, at paglilingkod sa kapwa dahil ang pagtatayo ng simbahan ay sumasalamin sa pagkilos ng Diyos sa puso ng mga taong handang maglingkod para sa kabutihan at kabanalan ng sambayanan.
“Ngayon po ay ginaganap ang Blessing of the Altar ng Holy Spirit Church. Ito po ay dahil sa kagandahang-loob ng Dizon Family, ng kanilang matriarch na si Sharon Dizon, ng kanyang mga anak, at ng buong pamilya, na siyang nagpagawa ng simbahang ito. Ang buong simbahan ay kanilang ibinigay bilang regalo sa Diocese of Antipolo. Ang mangangasiwa naman dito ay ang PACEM Missionaries, sa pamumuno at pangangasiwa ng Mary Mother of the Church Parish. Dito po natin makikita na ang lahat ay nagtutulungan, lahat ay nagbibigayan, at lahat ay handang maglingkod at magpakasakit para sa kaluwalhatian ng Diyos, para sa kabutihan at kabanalan ng sambayanan,” ayon sa panayam ng Radyo Veritas kay Bishop Santos.
Binigyang-diin ng Obispo na ang pagtatayo ng isang simbahan ay bunga ng pagkakaisa, pagtutulungan, at malasakit ng komunidad dahil sa bawat bahay ng Diyos na naitatayo ay nabibigyan ang mga mananampalataya ng pagkakataong higit na mapalalim ang kanilang ugnayan sa Panginoon at sama-samang maisabuhay ang kanilang pananampalataya.
“Dito rin natin nakikita na ang Diyos ay kumikilos. Hindi Siya nagpapabaya, hindi nag-iiwan, at ginagalaw Niya ang puso ng mga tao upang maitayo ang bahay ng Diyos—ang simbahan. Ito po ang naganap at aming ipinagpapasalamat sapagkat dito sa Barangay Dolores, Taytay, ay mayroon na namang bagong simbahan kung saan mararanasan ng mga tao ang pag-ibig at awa ng Diyos sa pamamagitan ng pagdiriwang ng mga sakramento at ng pagtulong sa kapwa, kami po ay nagpapasalamat, at kayo po ay aming inaanyayahan na pumunta at magsimba rito,” ayon pa sa panayam ng Radyo Veritas kay Bishop Santos.
Nagpasalamat naman si Bishop Santos sa Dizon Family at Seven Rose Petals Development Corporation na primary developers ng simbahan at sa pangunguna ng kanilang matriarch na si Sharon Dizon, sa pagkakaloob ng Holy Spirit Church bilang handog sa Diocese of Antipolo kasunod ng pagpapasalamat sa Mary Mother of the Church Parish sa pangangasiwa sa bagong simbahan upang patuloy itong maging tahanan ng pananalangin at biyaya para sa mga mananampalataya.
