10,385 total reads
Iniulat ng Department of Health (DOH) na bumaba ng 70 porsiyento ang naitalang kaso ng COVID-19 sa bansa ngayong taon kumpara sa kaparehong panahon noong 2025.
Ayon sa kagawaran, nakapagtala ng 1,532 kumpirmadong kaso mula January 4 hanggang July 11, 2026, kumpara sa 5,070 kaso sa kaparehong panahon noong nakaraang taon.
Inilabas ng DOH ang pahayag kasunod ng mga naunang ulat ng pagtaas ng COVID-19 cases sa Quezon City, na nilinaw ng kagawaran na nananatiling lokal o isolated at hindi sumasalamin sa kabuuang sitwasyon sa buong bansa.
“The DOH continues to closely monitor the situation through its regional offices and local government partners and maintains disease surveillance and response mechanisms nationwide,” ayon sa DOH.
Muling pinaalalahanan ng kagawaran ang publiko na bantayan ang mga sintomas ng COVID-19, kabilang ang lagnat, panginginig, pananakit ng lalamunan, ubo, sipon o baradong ilong, pananakit ng ulo at kasukasuan, at pagkawala ng panlasa at pang-amoy.
Pinayuhan din ng DOH ang mga nakararanas ng mga sintomas na agad magpakonsulta sa pinakamalapit na health center o healthcare facility upang mabigyan ng tamang lunas at maiwasan ang posibleng pagkalat ng sakit.
Hinikayat din ang publiko na ipagpatuloy ang mga pangunahing hakbang sa kalusugan tulad ng madalas na paghuhugas ng kamay, tamang respiratory etiquette, at pagpapanatili ng kalinisan upang makaiwas sa COVID-19 at iba pang respiratory illnesses.
“The DOH assures the public that it will continue to monitor the situation closely and provide timely, accurate, and verified information as needed,” ayon pa sa DOH.
Ipinapanalangin naman ng simbahan ang patuloy na kaligtasan ng bawat isa laban sa anumang uri ng nakahahawang karamdaman, at hinihikayat ang lahat na isabuhay ang malasakit sa kapwa sa pamamagitan ng responsableng pangangalaga sa sariling kalusugan at sa kapakanan ng buong pamayanan.
