377 total views
Binigyan-diin ni Father Jason Laguerta, Director ng Office for the Promotion of the New Evangelization (OPNE) at Philippine Conference on New Evangelization (PCNE) ang kahalagahan sa pagsisimula ng pagbabago sa ugnayan ng tao sa kapwa upang matugunan ang malalalim na suliranin ng bansa, kabilang ang kahirapan, katiwalian, at mga hamon sa ekonomiya.
Sinabi ni Fr. Laguerta na ang kulturang Pilipino na pakikipagkapwa ay bibigyang halaga sa PNCE 2026 na may temang “SANGKÁY: I Have Called You Friends,” na idaraos sa University of Sto.Tomas sa ika-24 hanggang ika-26 ng Hulyo, 2026.
Ipinaliwanag ng Pari na karaniwang naipapahayag sa mga kilos-protesta ang panawagan sa pagbabago ngunit mas pangmatagalan at mas malalim ang pagbabago na nagmumula sa kulturang Pilipino na pakikipag-kapwa na mas malaki ang maitutulong sa pagtugon sa mga problema ng bansa.
“Yung punto ng paano ito makakatulong nang mas malaki sa problema ng bansa, lalo na sa ekonomiya, politika, corruption, etc. Napakalaki , una, dinadaan natin madalas sa rally yung ating hinaing. Madalas ginagamit natin yung kalsada para sa social change o pagbabago ng lipunan, kung babalikan mo yung kulturang Pilipino, ng kapwa, ng kaibigan, hindi natin ginagamit madalas yung ganoong strategy. Ang laging ginagamit natin ay dahas sa dahas, plataporma sa plataporma, ideology sa ideology, hindi natin nakikita na tayo, mga Pilipino, malakas sa atin ang core value natin na kapwa. Ibig sabihin noon, ang ating pagkatao bilang mga Pilipino ay nakaugat sa pakikipagkapwa,” ayon sa panayam at mensahe ni Father Laguerta.
Iginiit ni Father Laguerta na ang tunay na pagbabago ay nagsisimula sa ‘conversion of relationships’ o pagbabago ng pakikitungo sa kapwa.
Ayon kay Fr.Laguerta, bago mabago ang mga sistema at istruktura ng lipunan ay kinakailangang mabago muna ang puso at pagtingin ng bawat isa sa kanilang kapwa bilang kasama sa buhay at hindi bilang taong maaaring lamangan o pagsamantalahan.
Naniniwala ang pari na kung maisasabuhay ng mga pinuno, kabataan at bawat mamamayan ang tunay na diwa ng pakikipagkapwa ay mababawasan ang katiwalian at iba pang ugat ng kahirapan dahil sa paggalang at pagmamalasakit sa kapwa.
Ibinahagi ni Fr.Laguerta na ang tunay na diwa ng pakikipagkapwa ang maging sentro ng talakayan sa tatlong na PCNE 2026.
“Kasi bago magkaroon ng conversion sa system, sa structure sa Pilipinas, kailangan magkaroon muna ng conversion o pagbabago sa pakikitungo. Halimbawa, sa pamilya, kailangan magkaroon ng pagbabago ng pakikitungo ng isa’t isa sa pamilya. Na hindi na asymmetrical o kaya hierarchical. Kung hindi, nandoon din yung sangkay sa pamilya. Kung magkaroon na ng ganoong kultura, palagay ko mas malawak at mas malalim yung pagbabago. Kasi binago natin ang puso at pakikipagkapwa,” bahagi pa ng mensahe ni Father Laguerta.
