1,019 total reads
Hinimok ng isang Catholic exorcist ang Simbahan na palakasin ang pagtuturo ng tunay na aral ng pananampalataya upang maprotektahan ang mga mananampalataya laban sa mga pamahiin at mga occult practices na nagdudulot ng matinding suliraning espirituwal.
Ayon kay Fr. Darwin Gitgano, exorcist ng Diocese of Tagbilaran at may-akda ng An Exorcist’s Real Encounters in Philippine Culture, isa sa mga maituturing na sanhi ng problema ay ang kakulangan ng wastong katesismo sa mga mananampalataya.
“Karamihan sa atin ay hindi na na-catechize sa tunay at dalisay na aral ng simbahan, kaya na-contaminate yung mga kapatid natin,” pahayag ni Fr. Gitgano sa Radyo Veritas.
Ibinahagi ng pari na mas maraming nakikitang kaso ng tinatawag na “obsession” o matinding negatibong pananaw at pag-iisip kumpara sa aktuwal na demonic possession.
“Yung possession ay hindi naman marami. Pero yung oppression, ang dami. Mas marami yung obsession,” dagdag pa ni Fr. Gitgano.
Partikular na binigyang-pansin ng exorcist priest ang kalagayan ng mga kabataan na aniya’y nakararanas ng matinding negatibong pananaw sa buhay.
“Yung mga kabataan ngayon ay negatibo na sa buhay, maraming mag-commit ng suicide. So naturally may problema sila, problematic, traumatic, natural ’yun. Pero ang demonyo, i-intensify niya, i-amplify niya,” paliwanag ng pari.
Dahil dito, nanawagan si Fr. Gitgano ng mas malalim na spiritual formation, kabilang ang pagbabasa ng Bibliya at ng mga buhay ng mga santo at mga martir.
“Kailangan ma-educate natin yung mga tao para yung harassment niya, obsession sa isipan pa lang, doon na natin haharapin siya,” giit ng pari.
Samantala, sa isang panayam ng himpilan kay Manila Chief Exorcist Fr. Jocis Syquia, ibinahagi nitong dalawa hanggang tatlong kaso ang kanilang tinatanggap araw-araw, na karamihan ay spiritual oppression.
Sa halip na umasa lamang sa exorcist, binigyang-diin ni Fr. Gitgano ang mahalagang papel ng pamilya sa patuloy na paggabay sa isang taong dumaraan sa ganitong karanasan.
Kabilang sa kanyang binigyang-diin ang regular na pagkukumpisal, pagtanggap ng Eukaristiya, pagdarasal ng Santo Rosaryo, adoration, paggamit ng mga sacramentals, at aktibong pakikibahagi sa buhay ng parokya.
“Yung spiritual growth nila, pagfo-focusan nila sa mataas na panahon dahil ’yun po ang real protection natin. Punta sila sa pari, maging active sila sa parokya,” ani Fr. Gitgano.
Inilunsad ni Fr. Gitgano ang kanyang aklat na An Exorcist’s Real Encounters in Philippine Culture sa booth ng St. Paul’s sa Manila International Book Fair sa SMX Convention Center sa Pasay City noong September 10.
Mabibili ang aklat sa mga sangay ng St. Paul’s sa buong bansa at sa kanilang online store.
