35,692 total reads
Nagpayag ng paglilinaw ang Diocese of Cubao kaugnay sa pagpanaw nitong Setyembre 11, 2026 ng dalawang pari ng diyosesis na sina Rev. Fr. Edward Anthony A. Cometa at Rev. Fr. Michael James I. Ty na kapwa nasa De Los Santos Medical Center sa Quezon City.
Ayon sa opisyal na pahayag ng Diocese of Cubao sa pamamagitan ng tagapagsalita nitong si Rev. Fr. Ariston l. Sison, Jr., pumanaw si Fr. Edward Cometa alas-2:07 ng hapon dahil sa heart failure dulot ng dilated cardiomyopathy, habang si Fr. Michael Ty naman ay pumanaw alas-2:57 ng hapon matapos ang matagal na karamdaman dahil sa liver cirrhosis at hepatocellular cancer.
Tatanggapin ni Cubao Bishop Elias Ayuban, Jr., CMF, D.D., ang mga labi ng dalawang pari sa Immaculate Conception Cathedral of Cubao ngayong Linggo, Setyembre 13, 2026 sa ganap na ala-una ng hapon, na susundan ng pagdiriwang ng Banal na Misa para sa dalawang pari.
Pagkatapos ng Misa, dadalhin ang mga labi ni Fr. Ty sa Cathedral Grottoes para sa kanyang burol, habang dadalhin naman ang mga labi ni Fr. Cometa sa Our Lady of Mount Carmel Parish sa Project 6, kung saan siya nagsilbi bilang Parochial Vicar.
Inihayag din ng Diocese of Cubao na ipalalabas ang karagdagang detalye hinggil sa kani-kanilang funeral arrangements sa mga susunod na araw.
Sa pahayag ng diyosesis, ipinagkatiwala ng Simbahan sina Fr. Cometa at Fr. Ty sa mapagmahal na awa ng Panginoon, bilang pasasalamat sa biyaya ng kanilang buhay, bokasyon sa pagkapari, at tapat na paglilingkod sa Diyos at sa Kanyang bayan.
Hiniling din ng Diyosesis ng Cubao sa mga mananampalataya na ipanalangin ang walang hanggang kapahingahan ng kanilang mga kaluluwa, gayundin ang kanilang mga pamilya, kapwa pari, kaibigan, mga pamayanang parokyal, at lahat ng nagluluksa sa kanilang pagpanaw.
