1,381 total reads
Hinimok ni Cebu Archbishop Alberto Uy ang mga mananampalataya na huwag lamang paghandaan ang kanilang kinabukasan sa mundo kundi higit sa lahat ang buhay na walang hanggan.
Ayon sa arsobispo, natural lamang na mag-ipon para sa pagtanda, kumuha ng insurance at paghandaan ang kinabukasan ng mga anak. Ngunit mahalaga ring pagtuunan ng pansin ang kanilang pananampalataya at ugnayan sa Diyos.
Sa kanyang pagninilay sa Ebanghelyo, ipinaliwanag ng arsobispo ang kuwento tungkol sa tusong katiwala na agad gumawa ng paraan upang masiguro ang kanyang kinabukasan nang malaman niyang mawawalan na siya ng trabaho.
Nilinaw ni Arcbishop Uy na hindi ang pagiging tuso o pandaraya ng katiwala ang pinuri ni Hesus kundi ang kanyang pagiging maagap sa paghahanda.
Ayon sa arsobispo, madalas na mas pinagkakaabalahan ng mga tao ang paghahanda para sa buhay sa mundo kaysa sa paghahanda para sa pakikipagtagpo sa Diyos.
Binigyang-diin ng pastol ng Cebu na hindi sapat ang pagkakaroon ng salapi, magandang trabaho at ari-arian kung napapabayaan naman ang pagmamahal sa kapwa at pananampalataya.
Hinimok din ng Arsobispo ang mga mananampalataya na huwag ipagpaliban ang paggawa ng mabuti.
“Kung may kailangan kang patawarin, patawarin mo na ngayon. Kung may nasaktan ka, humingi ka na ng tawad. Kung may mahirap kang matutulungan, gawin mo na ngayon,” panawagan ni Arcbishop Uy.
Idinagdag niyang panahon na upang itama ang mga pagkakamali, iwasan ang katiwalian at muling palakasin ang pananalangin.
Paalala ng arsobispo, hindi dapat hintaying tumanda o magkasakit bago bigyang halaga ang pananampalataya at ugnayan sa Diyos.
Aniya, maaaring mawala ang pera, posisyon at mga ari-arian, ngunit mananatili ang halaga ng pagmamahal, kabutihan at tulong na naibigay sa kapwa.
Hinamon ni Archbishop Uy ang mga mananampalataya na maging handang humarap sa Diyos anumang oras at gawing bahagi ng araw-araw na buhay ang paghahanda para sa buhay na walang-hanggan.
