1,296 total views
Mahalaga ang diwa ng Servant Leadership para sa pamumuno ng tapat ng mga opisyal hindi lamang ng pamahalaan kundi maging sa iba’t ibang larangan sa lipunan.
Ito ang ibinahagi Rev. Fr. Anton CT Pascual – Pangulo ng Veritas, Executive Director ng Caritas Manila at Spiritual Director ng Serviam Cathilic Charismatic Community Foundation Inc. kaugnay sa biyaya at grasya na ipinagkaloob ng Panginoon sa bawat isa.
Paliwanag ng Pari, ang anumang biyaya ng Diyos mula sa mga likhang produkto at mga serbisyo ay dapat na mapakinabangan ng lahat sa pamamagitan ng tamang distribusyon upang walang maisantabing sektor ng lipunan.
“anumang ating hanapbuhay o livelihood ito po ay grasya ng Panginoon, ang sabi nga sa Catholic Social Teaching, merong universal destination of goods ang lahat ng ito ay hindi para sa ating lang ang lahat ng ito ay para sa kapakinabangan ng lahat kaya’t dapat walang mahirap walang nangangailangan, sapagkat ang mga produkto at serbisyo ng ating mga negosyo at mga hanapbuhay ay para sa kabutihan ng lahat at hindi sa pagkasira ng tao o ng kalikasan dapat ito ay upang mapanatili na magpatalino sa ating, magpalusog, magpalakas sa ating henerasyon at sa susunod pa kaya’t mahalaga ang diwa ng Servant Leadership sa lahat ng ating mga ginagawa bilang mga namumuno…” pahayag ni Pascual sa panayam sa Radyo Veritas.
Unang inihayag ng Pari na ang mga negosyante o mga businessmen at mga business leaders ay maituturing na mga katuwang ng Panginoon sa pagbabahagi ng kanyang mga biyaya sa mga mamamayan.
Matatandaang bago matapos ang taong 2017 ay lumabas sa isinagawang survey ng Social Weather Station na tumaas pa ang bilang ng mga nagsasabing sila ay mahirap sa 47-porsyento o katumbas ng 11-milyong Pilipino.
