302 total views
Kinundina ng human rights group na In Defense of Human Rights and Dignity Movement o iDEFEND ang panggigipit ng pamahalaan partikular ng Bureau of Immigration sa mga international human rights defenders na nakikisimpatya sa kalagayan ng karapatang pantao sa bansa.
Ayon kay Ellecer Carlos, spokesperson ng iDEFEND na nakababahala ang magkasunod na hakbang ng Bureau of Immigration partikular na ang ginawang detention sa 71-taong gulang na Australian nun na si Sr. Patricia Fox dahil sa pagbibigay suporta sa mga magsasaka at mga katutubo at ang deportation noong linggo kay Party of European Socialists (PES) Deputy Secretary–General Giacomo Filibeck dahil sa black list order laban dito.
Giit ni Carlos, ang magkasunod na insidente sa parehong international human rights defender ay maituturing na isang paniniil sa karapatan sa pagpapahayag ng saloobin kaugnay sa pamamalakad ng pamahalaan partikular na ang kampanya laban sa ilegal na droga at ang implementasyon ng Martial Law sa Mindanao.
“We are alarmed at these operations as these may be pre-crackdown moves designed to warn the international community against criticizing the government’s anti-people policies. Both events are examples of repressive measures leveled against global human rights defenders by the government, which continue to implement a bloody war on drugs as well as Martial Law in Mindanao which violate the human rights of indigenous peoples,” pahayag ni Carlos sa Radio Veritas
Pagbabahagi ni Carlos, walang paglabag na ginawa si Sr. Fox sa kanyang Missionary Visa sa bansa sapagkat halos 3-dekada ng aktibo ang naturang madre sa pakikibahagi sa pagbibigay ng espirituwal at moral na gabay sa mga naaabusong magsasaka at mga katutubo.
Habang si Giacomo ay bahagi ng 2017 European fact finding mission na nagtungo sa Pilipinas noong nakalipas na taon upang tutukan ang mga kaso ng Extrajudicial killings na may kaugnayan sa kampanya ng pamahalaan laban sa ilegal na droga sa bansa.
Dahil dito, nangangamba ang iDEFEND na ang naturang magkasunod na hakbang ng B.I ay bahagi ng paraan ng pamahalaan upang mapigilan ang mga kritiko ng administrasyon na maisiwalat ang mga anumalya at hindi makataong programa ng paglabag sa karapatang-pantao ng mga Filipino.
Kaugnay nito, naunang nanawagan ang Catholic Bishops Conference of the Philippines – Episcopal Commission on the Laity sa bawat isa na patuloy na manindigan sa pagsusulong ng karapatan pantao at huwag magpasindak sa anumang hakbang ng pamahalaan upang siilin ang karapatan ng mamamayang Filipino.
