401 total views
Patuloy ang pakikipag-ugnayan ng Simbahan sa pamahalaan.
Ito ang tiniyak ni Imus Bishop Reynaldo Evangelista, Chairman ng Catholic Bishops Conference of the Philippines – Permanent Committee on Public Affairs upang mas mapabuti ang ugnayan ng dalawang institusyon.
Ayon sa Obispo, napakahalagang mapapalakas ang ugnayan ng pamahalaan at Simbahan upang mapanatili ang pagkakaisa ng bansa.
“Magtutuloy-tuloy ang dialouge, kami sa Permanent Committee on Public Affairs ang mag-uugnay sa simbahan at sa iba’t ibang ahensya ng pamahalaan.” pahayag ni Bishop Evangelista sa Radio Veritas.
Magugunitang ika – 28 ng Hunyo ng taong kasalukuyan ay nagpulong ang Philippine National Police at ang CBCP para pag-usapan ang pagkakapaslang sa 3 pari ng Simbahang Katolika at ang patuloy na malawakang kampanya kontra iligal na droga kung saan sa tala ng mga human rights group mahigit sa 20 – libo na ang napaslang.
Bukod dito, palalakasin din ang pakikipagtulungan ng Simbahan sa pangunguna ng Military Ordinariate of the Philippines sa mga tagapagpatupad ng batas para mas mapaunlad at maging maayos ang implementasyon ng mga batas sa Pilipinas.
“Ang mga Obispo ng CBCP, kasama ang Military Ordinariate ay patuloy na makikipag-ugnay sa mga nagpapatupad ng batas at sa ngayon ay may ilang mga Chaplains ng PNP na nakikipag-usap sa akin na magkakaroon pa kami ng pagtutulungan para tuloy-tuloy ang internal cleansing ng PNP para lalo pang mapaunlad at maiayos ang mga gawain.” dagdag ng Obispo.
Sa tala mayroong 130 mga Pari na naglilingkod sa PNP at AFP sa iba’t ibang bahagi ng bansa.
Umaasa si Bishop Evangelista na sa pamamagitan ng pagpapaigting sa pagtutulungan ng Simbahan at Pamahalaan ay magkakaroon ng pagkakaisa ang bawat mamamayan tungo sa pag-unlad at pagkamit ng kapaypaan sa bansa.
Una nang binigyang diin sa isang mensahe ng Kaniyang Kabanalang Francisco ang kahalagahan ng pagtutulungan ng lahat ng sektor sa lipunan upang mas lalong maitaguyod ang pagkakaisa ng bawat mamamayan.
