475 total reads
Kasama sa mga ipinamahaging tulong ng Caritas Manila ang ‘Sakulin’na isang all purpose tarpaulin’ na maaring gamitin bilang higaan, partisyon at pansamantalang bubungan sa panahon ng paglikas tuwing tag-ulan.
Ayon kay Fr. Ric Valencia, priest in-charge ng Caritas Damayan, isa rin itong paraan ng Caritas na gamitin ang mga lumang tarpaulin bilang bagong gamit.
“Maraming purpose yan. Iyan po ang pinamimigay natin para hindi masayang ang mga ganyang material at magkaroon ng panibagong gamit. Even the old tarpaulins we convert them into bags para ma-exercise din natin ang pangangalaga sa kalikasan,” ayon kay Fr. Valencia.
Dagdag pa ng pari, kasama din sa mga relief packs ng Caritas ang mga ‘healthy food items’ bilang kapalit ng mga delata hindi lamang bilang pamatid gutom kundi para sa kabutihan ng kanilang kalusugan.
Bawat relief packs ng Caritas Manila ay nagkakahalaga ng P600-pesos.
Kabilang sa mga napadalhan ng tulong ang Marikina, San Mateo, Rodriguez, Baseco sa lungsod ng Manila, Malabon, Caloocan at Quezon City.
“Unti-unti nating pinapalitan yung mga ibang delata ng mga pagkain na healthy options. Mga pagkain na makakatulong hindi lang sa pagtawid ng gutom kundi pati na rin sa kanilang kalusugan. Kasi kung natin sila binigyan ng pagkain na hindi nakakatulong sa kalusugan para na rin natin silang hindi natulungan kundi lumala pa ang kanilang kalagayan,” ayon kay Fr. Valencia.
Sa ulat, higit sa isang milyon katao ang naapektuhan ng malakas na pag-ulan at pagbaha mula sa 713 barangay sa Region 1 at 2; Calabarzon, Cordillera Administrative Region at Metro Manila.
Tulong-tulong naman ang limang diyosesis sa Metro Manila sa relief at rescue operations sa mga biktima ng habagat sa pamamagitan na rin ng Social Services Development Ministry ng bawat parokya.
Kabilang dito ang mga arkidiyosesis ng Manila at mga diyosesis ng Antipolo, Cubao, Caloocan at Novaliches.
Patuloy pa rin ang panawagan ng Caritas Manila sa mga nais na magbigay ng tulong para sa iba pang mga biktima ng habagat lalu’t patuloy pa rin ang mga pag-ulan na nararanasan sa malaking bahagi ng Luzon.
Naunang nanawagan si Manila Archbishop Luis Antonio Cardinal Tagle sa mga parokya na buksan ang kanilang simbahan sa mga nangangailangan ng tulong na biktima ng matinding pagbaha.
Read more: Cardinal Tagle,pinabubuksan ang mga Simbahan sa mga binahang residente
