633 total reads
Maituturing na isang kabalintunaan o “ironic” sa maalab na pananampalataya sa Panginoon ng mga Filipinong Kristyano’t Katoliko ang mga patuloy na karahasang nagaganap sa lipunan.
Inihayag Rev. Father Gilbert Billena, spokesperson ng Rise Up for Life and for Rights na nangangalaga at gumagabay sa pamilya ng mga biktima ng drug-related killings na ito ang isang kataka-takang sitwasyon sa bansa.
Ayon sa Pari, maituturing na isang kabalintunaan na sa kabila ng pagiging Kristyano ng mga Filipino ay napakarami pa ring mamamayan ang sumasang-ayon at walang ginagawang hakbang laban sa nagaganap na patayan sa lipunan.
“Ngayon katanungan sa atin ito, tayo ay isang bansang napaka-Kristyano pero maraming mga mamamayan natin ang nagpapahintulot sa ganitong kultura ng kamatayan…” pahayag ni Father Billena sa panayam sa Radio Veritas.
Naunang inihayag ng Pari na bumagal lamang ang pagtaas ng bilang sa kaso ng patayan sa bansa ngunit nagpapatuloy pa rin ito lalo na sa mga malalayong lalawigan sa Pilipinas.
Dahil dito, muling nanawagan si Fr. Billena na hindi dapat na balewalain ang mga kaso ng karahasan partikular na ang mga pagpaslang at paglabag sa karapatang pantao ng mga mamamayan.
Batay sa tala ng mga human rights group at ng mismong Philippine National Police, umaabot na sa higit 23-libo ang nasawi simula ng ipatupad ng administrasyong Duterte mas pinaigting na kampanya laban sa illegal na droga.
