454 total reads
Pinalalawak ng Simbahang Katolika ang pagkakawanggawa sa mga mahihirap sa bansa.
Ito ang inihayag ni Rev. Fr. Anton CT Pascual, pangulo ng Radio Veritas at Executive Director ng Caritas Manila hinggil sa patuloy na paghihirap ng mga Filipino dulot ng pagtaas ng presyo ng mga pangunahing bilihin sa bansa.
“Tayo naman [Simbahan] upang matulungan natin itong mga mahihirap, magkakawanggawa tayo para matulungan itong ating mga kababayang maliliit at direktang naapektuhan nitong pagtaas ng mga presyo ng bilihin.” pahayag ni Fr. Pascual.
Hinihikayat naman ng Pari ang pamahalaan na pag-aralan ang ipinatupad na reporma sa pagbubuwis tulad ng Tax Reform for Accelaration and Inclusion (TRAIN) Law.
Sinasabing ang TRAIN law ang dahilan sa pagtaas ng presyo ng produktong langis na nakaapekto sa presyo naman ng mga bilihin partikular sa mga produktong pang-agrikultura tulad ng bigas, mais at mga gulay.
Hinimok din ng pari ang bawat mamamayan na magtulungan upang maiangat ang bawat isa sa kahirapan at magkaisang manawagan sa pamahalaan na tugunan ang suliraning nakakaapekto sa lahat.
Batay sa resulta ng survey na isinagawa ng Social Weather Station noong nakalipas na buwan lumabas na 48 porsiyento o katumbas sa mahigit 11 milyong Filipino ang naghihirap dulot na rin ng mataas na presyo ng bilihin na kadalasang kinokonsumo ng ordinaryong mamamayan.
Patuloy namang itinanggi ng mga opisyal ng pamahalaan na TRAIN law ang dahilan sa pagtaas ng presyo ng mga bilihin at iginiit na ang pabago-bagong presyo ng produktong petrolyo sa pandaigdigang pamilihan ang sanhi nito.
Sa katuruan ng Simbahan inihayag nitong mahalagang bibigyang pansin ng estado ang pangangalaga sa kapakanan ng bawat mamamayang nasasakupan kasabay ng pag-unlad ng pamayanan.
