316 total reads
Umaapela ang Catholic Bishops Conference of the Philippines Episcopal Commission on Migrants and Itinerant People sa pamahalaan na bigyan ng agarang ayuda ang mga Overseas Filipino Worker sa Riyadh, Saudi Arabia na kabilang sa mga hinuli ng mga otoridad sa isang Halloween Party.
Ayon kay Diocese of Balanga Bishop Ruperto Santos, Chairman ng Kumisyon, ang mga nahuling OFW ay dumalo lamang sa naturang pagtitipon at hindi ang nag-organize ng nasabing Halloween Party.
Dahil dito, muling umaapela ang Obispo sa mga OFW hindi lamang sa Saudi Arabia kundi maging sa iba’t ibang bansa na maging mas maingat at igalang ang tradisyon at kultura sa mga bansang kanilang kinaroroonan.
“Let us exhaust all means to assist and help our OFWs who accidentally got involved of just attending Halloween party. It was not their intentions, nor they were promoters. We appeal to our OFWs to be more cautious and careful especially when peace and quiet could be disturbed.” mensaheng ipinaabot ni Bishop Santos sa Radyo Veritas.
Batay sa impormasyon mula sa Department of Labor and Employment (DOLE) at Department of Foreign Affairs (DFA) kabilang ang 17 OFW sa mga nahuli at idinetine ng mga otoridad matapos na matuklasan ang nagaganap na Halloween Party dahil sa reklamo ng ilang mga residente sa Al Thumama.
Kaugnay nito, pinaalalahanan ng Embahada ng Pilipinas ang mga OFW sa Saudi Arabia na iwasang dumalo o makibahagi sa mga pagtitipon na walang pahintulot o kaukulang permit mula sa Saudi government.
Kabilang sa ipinagbabawal ang pagtitipon ng publiko na may kaugnayan sa mga non-Islamic event at ang pagsama-sama ng mga lalaki at babae.
Selebrasyon ng All Saints’at All Souls’ Day
Nananawagan si Bishop Santos sa bawat isa na idaan sa pananalangin at pag-aalay ng banal na misa para sa mga namayapa ang paggunita ng Undas.
Ayon sa Obispo, ang Undas ay panahon upang muling alalahanin at bigyang pagpapahalaga ang naging buhay ng ating mga namayapang mahal sa buhay at hindi upang pagmulan ng mga katatakutan.
“Also here, as we celebrate November 1 let us focus more on praying, offering Holy Masses for our departed love ones. We remember them not to be afraid but with gratitude and love for what we are now it is because of them. We ask forgiveness, we forgive and commend them to God’s mercy. To celebrate November 1 is to scare or to party, but to uplift life.” Dagdag pa ni Bishop Santos.
Umaasa naman ang Simbahang Katolika na isasabuhay ng bawat mananampalataya ang layunin ng Undas na paggunita sa mga namayapa sa pamamagitan ng pagbisita sa kanilang mga himlayan at pag-aalay ng panalangin para sa ikapapayapa ng mga kaluluwa sa purgatoryo.
