440 total reads
Inihayag ng Philippine National Police mas maganda at mataas pa rin ang moral ng buong kapulisan sa naganap na 2 araw na imbestigasyon ng Senado sa kanilang hanay dahil sa extrajudicial killings sa bansa.
Ayon kay PNP spokesman Senior Supt. Dionardo Carlos, sa pagdinig naipahayag ni PNP Chief Director General Ronald ‘Bato’ dela Rosa sa taong-bayan na hindi malala ang kaso ng EJK lalo na at ang mga pagpatay ay iniimbestigahan.
Nabatid sa pagdinig na hindi lahat ng 1, 160 na kaso ng pagpatay mula July 1 hanggang August 22, 2016 ay extrajudicial killings dahil 273 lamang dito ang napatunayang may kinalaman sa operasyon ng ilegal na droga habang karamihan ay ibat-ibang krimen sa mga lansangan.
“Moral ng PNP, mas maganda at nagpapasalamat kami sa 2 araw na pagdinig sa Senado upang ipahayag natin sa taong bayan ang totoong nangyayari sa ating komunidad sa lansangan na ang EJK na kanilang sinasabi ay hindi ganoon ka grabe, hindi totoo na all this death na under investigation ay EJK at ang lahat ng deaths under investigation ay hindi naman sa ilalim ng EJK dahil sa 1,000 plus na death under investigation are not yet confirmed as drug related, and only 273 to be drug-related ,the rest are crimes that are happening in the streets and these are now under investigation.
Kaugnay nito, kinumpirma rin ni Sr. Supt. Carlos na may 282 na miyembro ng PNP ang sangkot sa ilegal na droga habang nagpositibo naman sa drug test ang nasa 130.
Ayon kay Carlos, patunay lamang ang pagkakatuklas na ito na seryoso ang administrasyong Duterte at si Gen. Dela Rosa na linisin ang hanay ng pulisya mula sa bawal na gamot.
“Kung hindi nabigyan ito ng pansin noong nakaraang administrasyon, seryoso ngayon ang PNP. Kaya may random and required drug testing, hindi tino-tolerate ito ng PNP, ang lahat ng sangkot ay may kautusan na para sa summary dismissal proceedings, the Chief PNP wants them out,” pahayag ni Carlos sa panayam ng Radyo Veritas.
Sa survey ng Philippine drug Enforcement Agency (PDEA) 94% ng mga barangay sa Metro Manila ay may operasyon ng ilegal na droga.
Mariing kinokondena ng Simbahang Katolika at ng estado ang ilegal na droga dahil sumisira ito hindi lamang ng pamilya, kundi maging kinabukasan ng mga kabataan at ng lipunan.
Una na ring inihayag ng mga obispo ng Simbahan na kinakailangan naman ng mga drug users ang rehabilitasyon habang ang mga drug pushers ay parusahan ng naaayon sa judicial process at hindi ang sintensiyahan sila ng kamatayan dahil may karapatan din ang mga itong magbagong buhay.
