439 total views
Nanawagan sa Simbahang Katolika ang Commission on Human Rights na mas maging aktibo sa pagsusulong ng pangangalaga at pagpapahalaga sa buhay sa gitna ng patuloy na pagtaas ng bilang ng mga biktima ng extra-judicial killings at summary executions sa war on drugs ng administrasyong Duterte.
Bukod sa mga pari, madre at Obispo, partikular na nanawagan si CHR Chairperson Jose Luis Martin Gascon sa mga taong Simbahan at mga mananampalataya na aktibong manindigan sa kasagraduhan ng buhay.
“Alam niyo, nung panahon ng diktaturya malaki yung papel na ginampanan ng Simbahan at mukhang sa kasalukuyang panahon na may ganitong malaking pagsubok ay muli may panawagan sa Simbahan hindi lamang po sa mga pari, madre at Obispo pero maging sa mga taong Simbahan na manindigan para sa mga prinsipyo ng Kristiyanismo partikular yung prinsipyo ng pangangalaga at pagpapahalaga sa buhay. Ibig sabihin may active citizenship muli ang ating mga alagad ng Simbahang Katolika…” panawagan ni Gascon sa Radio Veritas.
Iginiit ni Gascon na malaki ang papel na ginagampanan ng Simbahan sa paghubog sa tamang moral ng lipunan kaya’t napakahalaga ang paninindigan nito sa kasalukuyang sitwasyon sa bansa.
Sa pinakahuling tala ng Philippine National Police mula unang araw ng Hulyo hanggang ika-23 ng Agosto ay tinatayang umabot na sa 1,916 ang kabuuang bilang ng mga namatay, sa bilang na ito, 756 ang namatay sa gitna ng mga operasyon ng mga pulis habang itinuturing naman ng PNP na death under investigation ang 1,160 kaso ng pagkamatay na hinihinalang kagagawan ng mga vigilante at hindi pa nakikilalang mga salarin.
Mariing kinokondena ng Simbahang Katolika maging ng gobyerno ang sinasabing gawain lalo na at sinisentensiyahan ng kamatayan ang mga indibidwal na nagkasala na isang paglabag sa kanilang karapatan na mabuhay at maipagtanggol ang kanilang sarili sa harapan ng hukuman.
