43,609 total views
Naniniwala ang isang mambabatas na mahalaga ang tungkuling ginagampanan ng Simbahan para sa paggabay sa bawat isa patungo sa tamang landas sa lipunan.
Ito ang ibinahagi ni Senator Risa Hontiveros kaugnay sa pagsisilbing moral at ethical compass ng Simbahan lalo na sa mga mahahalagang usaping panlipunan tulad ng kontrobersyal na usapin ng Charter Change.
Ayon sa mambabatas, mahalaga ang pamumuno at aktibong pakikilahok ng Simbahan sa iba’t ibang mga koalisyon tulad ng bagong lunsad na KOALISYON LABAN SA CHACHA! upang higit na maipalaganap sa mga Pilipino ang kahalagahan ng pagkakaisa at paninindigan para sa kabutihan ng bayan.
“Napakahalaga talaga ng partisipasyon at pamumuno ng mga Simbahan sa ganitong mga koalisyon at paglunsad ng koalisyon kasi parang sila yung nagpapaingay ng tambuli na nagtatawag sa iba’t ibang mga Pilipino anuman ang ating pananampalataya Katoliko, protestante, evangelical, at iba pa na magkaisa nga sa isang totoong unity, magkaisa sa pagninilay, pagdarasal, pagbabantay, pagkilos lahat…” Bahagi ng pahayag ni Hontiveros sa Radio Veritas.
Paliwanag ng mambabatas, dapat na ganap na pagnilayan ng bawat mamamayan kung paano higit na mapoprotektahan at maisasakatuparan ang mga nakapaloob sa Konstitusyon na para sa ikabubuti ng sambayanan Pilipino at hindi ng interes ng iilan.
“Para pangalagaan at ipaglaban ang kapakanan ng nakararami hindi yung interes lang ng iilan na yun din naman ang kaluluwa ng Konstitusyon nakalagay dun, parang yung sulat pastoral ng CBCP, ‘Ano ang mabuti?’ nakalagay din po dun sa Konstitusyon so tamang dapat lamang mag-discern tayo ulit, ano yung mabuti na mga pangako dun sa Konstitusyon at ipatupad natin alang-alang sa kabutihan ng nakararami hindi yung kakasangkapanin lang ang Konstitusyon para sa interes ng iilan…” Dagdag pa ng mambabatas.
Matatandaang una ng tiniyak ng Catholic Bishops’ Conference of the Philippines (CBCP) ang pagsusumikap ng Kalipunan ng mga Obispo ng Pilipinas na makapagsagawa ng mga talakayan at pagpupulong upang mabuksan ang kamalayan ng bawat isa kaugnay sa usapin ng Saligang Batas ng Pilipinas at magabayan na makapagdesisyon ng para sa ikabubuti ng bayan.
Tinagurian bilang KOALISYON LABAN SA CHACHA! binubuo ang nasabing kowalisyon ng may 40-grupo mula sa iba’t ibang sektor ng lipunan na kinabibilangan ng mga church groups at people’s movement sa bansa na pawang naninindigan sa pagpapahalaga sa Saligang Batas ng Pilipinas na nagsisilbing sandigan ng mga karapatan, kalayaan at demokrasyang tinatamasa ng bansa.
Kabilang sa mga organisasyon at grupo ng Simbahan na kasapi ng kowalisyon ang development and advocacy arm ng Catholic Bishops’ Conference of the Philippines na Caritas Philippines sa ilalim ng CBCP-Episcopal Commission on Social Action, Justice and Peace o Caritas Philippines; Sangguniang Laiko ng Pilipinas; Catholic Educational Association of the Philippines (CEAP); Simbahang Lingkod ng Bayan (SLB); at CMSP – Conference of Major Superiors in the Philippines.
