590 total views
Inaanyayahan ng Radio Veritas ang mga Kapanalig na makiisa sa programang “Ang Banal na Oras” bilang pakikiisa sa paggunita sa Earth Hour ngayong taon
Ito’y sa pakikipagtulungan ng World Wildlife Fund for Nature – Philippines at Association of Major Religious Superiors in the Philippines na isasagawa mamayang alas-8 hanggang alas-10 ng gabi.
Tema ngayong taon ang #SpeakUpForNature na hinihikayat ang lahat na kumilos upang muling mabuo ang lipunang mag-aakay tungo sa ekonomiyang uunahin ang kapakanan ng kalikasan.
Binibigyang-diin dito na dapat ipahayag at ipagtanggol ng bawat isa ang kalikasan upang makita at marinig ng iba’t ibang pinuno ng mga bansa ang nais ipaglaban ng mamamayan para sa karapatan ng ating nag-iisang tahanan.
Tatalakayin sa programa ang mga suliraning patuloy na hinaharap ng bansa dahil sa walang tigil na pagsira sa kalikasan at ang kasalukuyang epekto ng nakamamatay na coronavirus disease.
Samantala, magsisilbi namang host ng programa ng himpilan si Fr. Angel Cortez, OFM, ang co-executive secretary ng AMRSP.
Kabilang sa mga magiging tagapagsalita sina Manila Apostolic Administrator Most Rev. Broderick Pabillo; NASSA/Caritas Philippines Communications and Partnerships Development Coordinator Ms. Jing Rey Henderson; at ang National Director ng WWF-Philippines na si Atty. Angela Ibay.
Isasagawa rin sa programa ang tradisyonal na pagpapatay ng mga ilaw sa loob ng isang oras, simula alas-8:30 hanggang alas-9:30 ng gabi at sasabayan ng sama-samang pagdarasal ng Santo Rosario kasama ang Consecrated Men and Women in the Philippines sa pangunguna ng Dominicas dela Anunciata mula sa Anunciata Community.
Mapapanood ang programa sa Veritas846.ph facebook page at mapapakinggan sa DZRV 846 KHz AM.
Taong 2007 nang unang isagawa ang programa sa Sydney, Australia, at 2008 nang ilunsad naman ito sa Pilipinas.
Hinihikayat naman ng WWF-Philippines ang mga Filipino na makiisa sa pamamagitan ng pagbabahagi ng mga online content at gamitin ang mga hashtag na #EarthHour2021, #Connect2Earth at #SpeakUpForNature.
