720 total reads
Naniniwala ang National Council of Churches in the Philippines (NCCP) na mahalaga ang espiritwal na paggabay na naipagkakaloob ng iba’t ibang mga relihiyon at denominasyon sa mamamayan lalo na sa gitna ng krisis na dulot ng COVID-19 pandemic sa bansa.
Ito ang binigyang diin ni NCCP General Secretary Bishop Reuel Norman Marigza bilang suporta sa naging pag-alma nina Archdiocese of Manila Apostolic Administrator Bishop Broderick Pabillo at Kalookan Bishop Pablo Virgilio David sa muling pagbabawal ng IATF na makapagsagawa ng religious gathering sa Metro Manila at mga karatig lalawigan ng walang konsultasyon mula sa mga opisyal ng mga Simbahan.
Ayon kay Marigza, higit na kinakailangan ng mga mamamayan ang espiritwal na paggabay na naibabahagi ng iba’t ibang mga gawaing pansimbahan upang mabawasan ang mga pangamba ng mamayan.
“In these anxious times, more than the strict, unjust, and inconsistent imposition of orders, the spiritual succor that the churches bring are much needed by the people. Churches and the religious services they provide, help people by providing spiritual support system, morale-boosting, help in reducing psychological stress and promote good mental health,” pahayag ni Bishop Reuel Norman Marigza.
Matatandaang umalma sina Bishop Pabillo at Bishop David sa unang inilabas na kautusan ng IATF na nagbabawal sa anumang religious gatherings sa paggunita ng Semana Santa sa NCR plus buble. Samantala batay sa pinakahuling anunsyo ng pamahalaan, pahihintulutan na ng IATF ang pagdalo ng 10-porsyento ng kapasidad ng mga Simbahan at lahat ng mga bahay dalanginan ngunit para sa isang beses lamang na gawaing pansimbahan sa loob ng isang hanggang sa ika-4 ng Abril.
