672 total views
Pinaalalahanan ni Cebu Archbishop Jose Palma ang mananampalataya na pahalagahan ang biyaya ng pananampalatayang tinanggap ng bawat isa.
Ito ang bahagi ng pagninilay ng arsobispo sa pagsisimula ng triduum celebrations para sa pagdiriwang ng unang binyag sa bansa na naganap 500 taon ang nakalipas.
Ipinaliwanag ni Archbishop Palma na ang bawat pagbibinyag ay magsilbing paalala sa bawat kristiyano ng pagtanggap sa dakilang habag, awa at pag-ibig ng Panginoon.
“Because of God’s love and mercy we receive the blessing of a new life; and so we are reminded to treasure this gift,” bahagi ng pagninilay ni Archbishop Palma.
Abril 11 kasabay ng pagdiriwang ng kapistahan ng Divine Mercy ay isinagawa ng arkidiyosesis ang pagbibinyag sa 100 sanggol bilang hudyat ng pagsisimula sa triduum celebrations.
Ito ay ginanap sa Archdiocesan Shrine of Our Lady of Guadalupe sa Cebu City.
Sinabi pa ni Archbishop Palma na bagamat sa kasalukuyan ay hindi pa maunawaan ng mga bininyagang sanggol, darating ang panahon na kanilang ipagpasalamat sa Diyos ang pagtanggap ng kaloob na kristiyanismo sa makasaysayang pagdiriwang ng ikalimang sentenaryo.
Nagagalak ang arsobispo kasabay ng paalala sa mga magulang na sa pagbibinyag ng kanilang mga anak ay magiging ganap na bahagi na ito ng sambayanan ng Diyos.
“They are your children. But the moment they are baptized, they become children of God – members of the Church, heirs of the kingdom of God. What a great privilege! All because of God’s mercy and love,” ani ng arsobispo.
Katuwang ni Archbishop Palma sa mass baptism si Cebu Archbishop Midyphil Billones at Palo Archbishop John Du kasama ang ilang pari ng arkidiyosesis.
Batay sa kasaysayan Abril 14, 1521 nang unang inihasik ng misyonerong Espanyol ang binhi ng pananampalataya sa lalawigan ng Cebu kung saan unang tumanggap sina Raja Humabon, Reyna Juana at iba pang kasamahan.
